Indian Railways: રેલવે મુસાફરો માટે ખુશખબર: IRCTCની ઈ-પેન્ટ્રી સર્વિસ શરૂ, હવે કન્ફર્મ અને RAC ટિકિટ પર સીટ પર જ મળશે ગરમાગરમ ભોજન
છેલ્લું અપડેટ : 11 Feb 2026
Indian Railways: ભારતીય રેલવે દ્વારા મુસાફરોની સુવિધામાં સતત વધારો કરવામાં આવી રહ્યો છે. હવે ટ્રેનમાં મુસાફરી કરતા મુસાફરોને ખાવા-પીવાની સમસ્યામાંથી મુક્તિ અપાવવા માટે IRCTC એ 'ઈ-પેન્ટ્રી' (e-Pantry) સેવાની શરૂઆત કરી છે. આ સુવિધા હેઠળ મુસાફરો ટિકિટ બુકિંગ સમયે જ પોતાનું ભોજન ઓનલાઈન ઓર્ડર કરી શકશે અને મુસાફરી દરમિયાન સીટ પર જ ડિલિવરી મેળવી શકશે.
કોને મળશે આ સુવિધાનો લાભ?
IRCTCની આ સેવાનો લાભ માત્ર એવા મુસાફરોને જ મળશે જેમની પાસે કન્ફર્મ અથવા RAC ટિકિટ હશે. ખાસ કરીને જે ટ્રેનોમાં ટિકિટના ભાડામાં ભોજન સામેલ નથી હોતું અથવા જેમાં પેન્ટ્રી કારની વ્યવસ્થા નથી હોતી, તેવા મુસાફરો માટે આ સેવા આશીર્વાદરૂપ સાબિત થશે. મુસાફરો સ્ટાન્ડર્ડ ભોજનની સાથે 'રેલ નીર' પણ અગાઉથી ઓર્ડર કરી શકશે.
મીલ વેરિફિકેશન કોડ (MVC)થી મળશે સુરક્ષા
જ્યારે તમે ઓનલાઈન ખાવાનું બુક કરશો, ત્યારે તમને SMS અને ઈ-મેઈલ દ્વારા એક કન્ફર્મેશન મેસેજ અને 'મીલ વેરિફિકેશન કોડ' (MVC) મોકલવામાં આવશે. જ્યારે વૅન્ડર તમારી સીટ પર ખાવાનું લઈને આવશે, ત્યારે તમારે આ કોડ આપવાનો રહેશે, ત્યારબાદ જ ભોજનની ડિલિવરી કરવામાં આવશે. જો કોઈ કારણસર બુક કરેલું ખાવાનું ન મળે, તો મુસાફરો રિફંડ માટે પણ અરજી કરી શકશે.
આ મુખ્ય ટ્રેનોમાં શરૂ થઈ સેવા
શરૂઆતના ગાળામાં આ સેવા વિવેક એક્સપ્રેસ સહિત 25 ટ્રેનોમાં શરૂ કરવામાં આવી છે. જેમાં સ્વતંત્રતા સેનાની એક્સપ્રેસ, કર્ણાટક સંપર્ક ક્રાંતિ, પુષ્પક એક્સપ્રેસ, પશ્ચિમ એક્સપ્રેસ, ગ્રાન્ડ ટ્રંક એક્સપ્રેસ અને અમદાવાદ-બરૌની એક્સપ્રેસ જેવી મુખ્ય ટ્રેનોનો સમાવેશ થાય છે.
