Video: 'હું સાસુ ઈન્દિરા ગાંધીથી ખૂબ ડરતી હતી અને તેમને 'મા' કહેવા તૈયાર નહોતી...' સોનિયા ગાંધીએ પુસ્તકમાં ખોલ્યા મોટા રહસ્યો!

સોર્સ: gstv

કોંગ્રેસ સંસદીય દળ (CPP) ના અધ્યક્ષા સોનિયા ગાંધીએ પોતાના નવા સંસ્મરણ (મેમોયર) 'બિલોંગિંગ: અ જર્ની ઓફ લવ' (Belonging: A Journey of Love) માં પોતાના અંગત જીવન અને પૂર્વ વડાપ્રધાન ઈન્દિરા ગાંધી સાથેના સંબંધો અંગે અત્યંત રસપ્રદ અને ભાવુક ખુલાસા કર્યા છે. સોનિયા ગાંધીએ જણાવ્યું છે કે શરૂઆતના દિવસોમાં તેઓ તેમના સાસુ ઈન્દિરા ગાંધીથી ખૂબ જ ડરતા હતા અને તેમને 'મા' કે 'મમ્મી' કહીને સંબોધવા માટે બિલકુલ તૈયાર નહોતા.

'મારા માટે માત્ર એક જ મા હતી, મારી ઈટાલિયન માતા'

જાહેરાત

પોતાના પુસ્તક અંગે વાત કરતા સોનિયા ગાંધીએ યાદ કર્યું હતું કે, "હું શ્રીમતી ગાંધી સિનિયર (ઈન્દિરા ગાંધી) થી ખૂબ જ ડરતી હતી. મને સમજાતું નહોતું કે તેમની પાસે કેવી રીતે જવું કે શું વાત કરવી. મારા પતિ રાજીવ અને તેમના ભાઈ સંજય તેમને 'મા' કહીને બોલાવતા હોવાથી, મારી પાસે પણ એવી અપેક્ષા રાખવામાં આવતી હતી કે હું તેમને 'મા' અથવા 'મમ્મી' કહું. પરંતુ હું તે કરવા માટે બિલકુલ તૈયાર નહોતી."

તેમણે આ પાછળનું કારણ જણાવતા કહ્યું કે, "મારા માટે દુનિયામાં માત્ર એક જ મા હતી, અને તે હતી મારી મમ્મા, મારી ઈટાલિયન માતા. હું અન્ય કોઈને મા કહેવા માંગતી નહોતી. તેથી હું તેમને 'મા' કહ્યા વિના આડકતરી રીતે વાત કરવાના રસ્તા શોધતી રહેતી. જોકે, સમય જતાં જેમ જેમ હું તેમને ઓળખતી ગઈ, તેમ તેમ હું તેમને બોલાવી શકી, પરંતુ તેમાં ઘણો સમય લાગ્યો હતો."

ઈન્દિરા ગાંધીના ગુસ્સાથી થથરી જતા હતા સોનિયા

ઈન્દિરા ગાંધીના પ્રભાવશાળી વ્યક્તિત્વ વિશે લખતા સોનિયા ગાંધીએ જણાવ્યું કે, "તેઓ અત્યંત પ્રભાવશાળી (ફોર્મિડેબલ) હતા. હું તેમનાથી પ્રભાવિત હતી અને થોડી ડરતી પણ હતી, કારણ કે ક્યારેક-ક્યારેક જ્યારે તેઓ ગુસ્સે થતા, ત્યારે મને મારા પિતાની યાદ આવી જતી અને હું એકદમ થીજી (ફ્રીઝ) જતી હતી. આવા સમયે મારા પતિ અને તેમના ભાઈ સંજય ગુસ્સાનું આ તોફાન શાંત ન થાય ત્યાં સુધી ચૂપચાપ બેસી રહેતા હતા. જોકે, આવું બહુ ઓછી વખત બનતું હતું."

રાહુલ અને પ્રિયંકાના જન્મ પછી બદલાઈ ગયા હતા ઈન્દિરા ગાંધી

સોનિયા ગાંધીએ વધુમાં ઉમેર્યું હતું કે પૌત્ર-પૌત્રીના આગમન બાદ ઈન્દિરા ગાંધીના સ્વભાવમાં મોટો બદલાવ આવ્યો હતો. તેમણે કહ્યું કે, "જ્યારે રાહુલ અને પ્રિયંકાનો જન્મ થયો, ત્યારે તેઓ સંપૂર્ણપણે બદલાઈ ગયા હતા. મને લાગે છે કે મોટાભાગની દાદીઓની જેમ જ તેઓ પણ વધુ નરમ (સોફ્ટ) બની ગયા હતા, અને ત્યારબાદ તમને એવું અનુભવાય છે કે તેઓ તમને વધુ સારી રીતે સમજી રહ્યા છે."

આ સમાચાર શેર કરો

જાહેરાત