VIDEO: 'હું કાંઈ બાબા બાગેશ્વર નથી...'; PM મોદીએ IIT દિલ્હીના વિદ્યાર્થીઓ સમક્ષ કેમ કહી આ વાત?
છેલ્લું અપડેટ : 08 Aug 2026
નવી દિલ્હી: વડાપ્રધાન નરેન્દ્ર મોદી (PM Narendra Modi) શનિવારે IIT દિલ્હીના 57મા પદવીદાન સમારંભમાં (Convocation Ceremony) હાજર રહ્યા હતા. આ પ્રસંગે તેમણે પાસ આઉટ થતા વિદ્યાર્થીઓને નવી શરૂઆત માટે અભિનંદન પાઠવ્યા હતા અને તેમના ઉજ્જવળ ભવિષ્યની કામના કરી હતી. સંબોધન દરમિયાન પીએમ મોદીએ પોતાના હળવા અને રમૂજી અંદાજમાં વિદ્યાર્થીઓ સાથે વાતચીત કરીને આખા માહોલને હળવો બનાવી દીધો હતો.
"હું બાબા બાગેશ્વર તો નથી, પણ..."
પોતાના સંબોધન દરમિયાન પીએમ મોદીએ વિદ્યાર્થીઓને રમૂજી અંદાજમાં કહ્યું કે, આજે બધા જ વિદ્યાર્થીઓ પદવીદાન સમારંભમાં હાજર છે, પરંતુ તેમના મનમાં ભવિષ્યને લઈને ચોક્કસ કંઈકને કંઈક ચાલી રહ્યું હશે. તેમણે સ્મિત સાથે ઉમેર્યું:
"હું બાબા બાગેશ્વર (Baba Bageshwar) તો નથી, પણ મને ખબર છે કે તમારા મનમાં કંઈક તો ચાલી રહ્યું હશે! દરેક વિદ્યાર્થીના મનમાં આવનારા કાલની એક અલગ તસવીર હોય છે."
વિદ્યાર્થીઓના ભવિષ્યના સપનાઓનો ઉલ્લેખ કરતા વડાપ્રધાને કહ્યું કે, કોઈ વિદ્યાર્થી પોતાની પહેલી નોકરી અને સેલેરીની (Job & Salary) રાહ જોઈ રહ્યો હશે, તો કોઈ પોતાનો નવો સ્ટાર્ટઅપ (Startup) શરૂ કરવાનું સપનું જોઈ રહ્યું હશે. વળી, કેટલાક વિદ્યાર્થીઓ આગળની સ્પર્ધાત્મક પરીક્ષાઓની (Competitive Exams) તૈયારી કરવાનો ધ્યેય રાખીને બેઠા હશે. દરેકનો લક્ષ્યાંક અલગ છે, પરંતુ આજે દરેકના મનમાં એક સરખો ઉત્સાહ છે.
IIT નો પહેલો દિવસ યાદ કરાવ્યો
પીએમ મોદીએ વિદ્યાર્થીઓને IIT દિલ્હીમાં વિતાવેલો તેમનો પહેલો દિવસ યાદ કરવા કહ્યું હતું. તેમણે કહ્યું કે, એવું લાગતું હશે જાણે ગઈકાલે જ ઓરિએન્ટેશન (Orientation Day) થયું હતું અને જોતજોતામાં આજે કન્વોકેશનનો દિવસ આવી ગયો! આજથી તમામ વિદ્યાર્થીઓના જીવનમાં એક નવો અધ્યાય શરૂ થઈ રહ્યો છે.
દરમિયાન, તેમણે ગોલ્ડ મેડલ મેળવનાર વિદ્યાર્થીઓને અભિનંદન આપતાં એક ખાસ વાત કહી. તેમણે કહ્યું કે: "ઘણા વિદ્યાર્થીઓને તેમની સિદ્ધિઓ માટે મેડલ મળ્યા છે, જેના માટે હું અભિનંદન આપું છું. પરંતુ જો મેડલ મેળવનારાઓમાં વધુ છોકરીઓ (Female Students) હોત તો વધુ સારું થાત. માત્ર એક કે બે જ કેમ? આ સંખ્યા હજુ વધારે હોવી જોઈએ."
"બદલાતી દુનિયામાં એ જ આગળ વધશે જે સતત શીખતો રહેશે"
વડાપ્રધાને ટેકનોલોજીની બદલાતી દુનિયા પર પ્રકાશ પાડતા જણાવ્યું કે: આજે વિશ્વનો ગ્લોબલ ઓર્ડર (Global Order) ઝડપથી બદલાઈ રહ્યો છે અને તેની પાછળ ટેકનોલોજી (Technology) સૌથી મોટું કારણ છે. આવનારા 20-30 વર્ષમાં દુનિયા કેવી હશે તેનો અંદાજ લગાવવો મુશ્કેલ છે. ટેકનોલોજી બદલાશે, યુગ બદલાશે, પરંતુ આ બદલાતી દુનિયામાં એ જ વ્યક્તિ આગળ વધશે જે સતત નવું શીખતો રહેશે (Continuous Learning).
વિકસિત ભારત માટે રાષ્ટ્રીય જવાબદારી
આઝાદી પહેલાની પેઢીના સંઘર્ષો અને ત્યાગને યાદ કરતા પીએમ મોદીએ કહ્યું કે, દરેક પેઢીની પોતાની એક રાષ્ટ્રીય જવાબદારી (National Responsibility) હોય છે. સ્વતંત્રતા સેનાનીઓએ દેશને આઝાદ કરાવવા બલિદાન આપ્યા હતા, જેના કારણે આજે આપણે મુક્ત ભારતમાં શ્વાસ લઈ રહ્યા છીએ.
તેમણે વિદ્યાર્થીઓને આહ્વાન કર્યું કે, આવનારા 30-35 વર્ષમાં તેઓ જે પણ કામ કરશે, તેની સીધી અસર 'વિકસિત ભારત'ના (Viksit Bharat) રોડમેપ પર પડશે. તેથી દરેક નિર્ણય લેતી વખતે એ વિચારવું જોઈએ કે તેનાથી દેશને શું ફાયદો થશે અને દેશની કઈ જરૂરિયાત પૂરી થશે.