VIDEO: RTI અરજી બાદ અભિજિત દીપકેનો જવાબ, 'હું પુરાવા આપીશ, ભાજપ ડિગ્રી બતાવે'
છેલ્લું અપડેટ : 03 Aug 2026
અભિજિત દીપકેએ સોશિયલ મીડિયા પર વીડિયો જાહેર કરીને ભાજપના નેતાઓને પડકાર ફેંક્યો છે. અભિજિત દીપકેએ વીડિયો જાહેર કરીને કહ્યું છે કે, તે પોતાના અભ્યાસ સંબંધિત સ્કોલરશિપ અને એજ્યુકેશન લોનના દસ્તાવેજો બતાવવા માટે તૈયાર છે, પરંતુ તે ભાજપના નેતાઓને તેમની ડિગ્રી જાહેર કરવાની માંગ કરે છે. આ વીડિયો સુરતના એક RTI કાર્યકર્તા દ્વારા તેમના પિતાની આર્થિક સ્થિતિ, CJPના લીગલ ડિફેન્સ ફંડ અને કપિલ સિબ્બલ દ્વારા જાહેર કરાયેલા 1 કરોડ રૂપિયાના યોગદાનની તપાસની માંગ કર્યા બાદ સામે આવ્યો છે.
'હું સ્કોલરશિપ લેટર બતાવવા તૈયાર'
દીપકેએ કહ્યુ છે કે, 'હું મારી સ્કોલરશિપનો લેટર અને એજ્યુકેશન લોનનો લેટર બતાવવા માટે તૈયાર છું. શું તમારા નેતા તેમની અસલી ડિગ્રી બતાવશે?' સોશિયલ મીડિયા પર વીડિયો જાહેર કરીને અભિજિત દીપકેએ અનેક સવાલો ઊભા કર્યા છે. અભિજિત દીપકેનો દાવો છે કે, ભાજપના એક કાર્યકર્તાએ તેમના શિક્ષણ અને વિદેશ અભ્યાસ અંગે RTI દાખલ કરી છે. તેના જવાબમાં તેમણે પોતાના દસ્તાવેજો દર્શાવવાની વાત કહી, અને ભાજપના નેતાઓને ડિગ્રી જાહેર કરવાનો પડકાર આપ્યો.
ગુજરાતના સુરતના એક RTI કાર્યકર્તા અમિત તિવારીએ ચૂંટણી પંચ અને સેન્ટ્રલ GST વિભાગને પત્ર લખીને અભિજિત દીપકેના પિતાની આર્થિક સ્થિતિ, વિદેશમાં અભ્યાસનો ખર્ચ અને CJPના નામે એકત્ર કરાતા લીગલ ડિફેન્સ ફંડની તપાસ કરવાની માંગ કરી હતી.
વીડિયોમાં અભિજિત દીપકેનું નિવેદન
અભિજિત દીપકેએ કહ્યું કે, તેમણે જોયું છે કે ભાજપના કાર્યકર્તાએ તેમની વિરુદ્ધ RTI દાખલ કરીને શિક્ષણ મેળવવાની પ્રક્રિયા પર સવાલ ઉઠાવ્યા છે. તેમણે પૂછ્યું કે, જો કોઈ સામાન્ય પરિવારનો દીકરો બોસ્ટન યુનિવર્સિટીમાં ભણવા જાય તો તેનાથી કોઈને શું તકલીફ હોઈ શકે?
RTI કાર્યકર્તાએ ઉઠાવ્યા સવાલો
સુરતના RTI કાર્યકર્તા અમિત તિવારીએ અભિજિત દીપકેના પિતા ભગવાનરાવ દીપકેની આર્થિક સ્થિતિની તપાસની માંગ કરી છે. તેમણે એ પણ સવાલ ઉઠાવ્યો છે કે , પિતા મહારાષ્ટ્ર સરકારના નિવૃત્ત કર્મચારી હોવાથી, નિવૃત્ત કર્મચારી પુત્રને વિદેશમાં ઉચ્ચ શિક્ષણ કેવી રીતે અપાવી શકે તેની નાણાકીય તપાસ થવી જોઈએ.
NEET વિરોધ અને CJP ફંડિંગનો વિવાદ
આ સમગ્ર મામલો NEET પેપર લીકના વિરોધમાં પ્રદર્શન કરનારા CJP કાર્યકર્તાઓને મળતી કાનૂની સહાય અને 1 કરોડ રૂપિયાના લીગલ ડિફેન્સ ફંડ સાથે જોડાયેલો છે. RTI કાર્યકર્તાએ CJPના રજિસ્ટ્રેશન અને વરિષ્ઠ વકીલ કપિલ સિબ્બલ દ્વારા જાહેર કરાયેલા 1 કરોડ રૂપિયાના ફંડ પર 18% GSTની ચૂકવણી અંગે પણ તપાસની માંગ કરી છે.
