VIDEO: પ્રિયદર્શનના ગયા પછી, શું અહેમદ ખાન 'હેરા ફેરી 3'નું દિગ્દર્શન કરશે? તેણે કહ્યું- 'હું તેનો હિસ્સો ચોક્કસપણે...'
છેલ્લું અપડેટ : 07 Aug 2026
અક્ષય કુમાર, સુનીલ શેટ્ટી અને પરેશ રાવલની આઇકોનિક ત્રિપુટીને ફરી એકવાર સિલ્વર સ્ક્રીન પર સાથે જોવા માટે ફેન્સ આતુરતાથી રાહ જોઈ રહ્યા છે. 'હેરા ફેરી 3' ની સત્તાવાર જાહેરાત થઈ ચૂકી હોવા છતાં ફિલ્મ અટકેલી જોવા મળી રહી છે. એક તરફ એક પ્રોડ્યુસર ફિલ્મ પર પોતાના રાઈટ્સ હોવાનો દાવો કરી રહ્યા છે, તો બીજી તરફ દિગ્દર્શક પ્રિયદર્શને આ પ્રોજેક્ટ છોડી દીધો છે. પ્રિયદર્શને ખુલાસો કર્યો હતો કે પ્રોડ્યુસર ફિરોઝ નાડિયાડવાલાએ તેનું અનેકવાર અપમાન કર્યું હતું. અક્ષય, સુનીલ અને પરેશની વિનંતીથી તે ફિલ્મ કરવા તૈયાર થયો હતો, પરંતુ હવે તે આ ફિલ્મનો હિસ્સો નથી. આ તમામ વિવાદો વચ્ચે હવે કોરિયોગ્રાફર અને ડિરેક્ટર અહમદ ખાને 'હેરા ફેરી 3' સાથે જોડાવાના સંકેત આપ્યા છે.
શું અહમદ ખાન સંભાળશે 'હેરા ફેરી 3'નું નિર્દેશન?
અહમદ ખાને તાજેતરમાં જ અક્ષય, સુનીલ અને પરેશ સાથે 'વેલકમ ટુ ધ જંગલ' ફિલ્મ કરી છે. એક રિપોર્ટ મુજબ, 'હેરા ફેરી 3' ના ડિરેક્શન અંગે વાત કરતા અહમદ ખાને જણાવ્યું હતું કે, "આ એક એવું સ્થાન છે જ્યાં દરેક વ્યક્તિ કામ કરવા ઈચ્છે. અક્ષય કુમાર, સુનીલ શેટ્ટી, પરેશ રાવલ, ફિરોઝ નાડિયાડવાલા અને 'હેરા ફેરી' એક પરિવાર જેવા છે અને હું પણ તે સિનેમાનો એક ભાગ રહ્યો છું."
અહમદ ખાને ત્રિપુટીના કટિબદ્ધ ફ્લો અને કોમિક ટાઈમિંગ અંગે કરી વાત
પોતાના અનુભવ વિશે વધુ વાત કરતા અહમદ ખાને કહ્યું કે, "મેં તે ત્રણેય કલાકારો સાથે કામ કર્યું છે અને મારી કારકિર્દીની શરૂઆત પણ અક્ષય અને સુનીલ સાથે જ થઈ હતી. જ્યારે આ ત્રણેય મારી ફિલ્મમાં હતા ત્યારે હું તેમને બાબુરાવ, શ્યામ કે રાજુ તરીકે નહતો જોઈ રહ્યો, મારા માટે તેઓ મારી ફિલ્મના પાત્રો હતા. પરંતુ જ્યારે આ ત્રણેય સાથે આવે છે ત્યારે લોકોની નજર તેમને તે જ આઇકોનિક પાત્રોમાં જોવા ટેવાયેલી હોય છે. આજે પણ તે ત્રણેયનું કોમિક ટાઈમિંગ પહેલા જેવું જ અદ્ભુત છે."
ડિરેક્ટ કરું કે નહીં, પણ ફિલ્મ સાથે ચોક્કસ જોડાઈશ: અહમદ ખાન
અહમદ ખાને આગળ ઉમેર્યું હતું કે, "આ ફિલ્મ જ્યારે પણ બનશે, હું તેનો હિસ્સો ચોક્કસપણે હોઈશ. હું તેને ડિરેક્ટ કરું કે નહીં, પણ અમે બધા મળીને આ ફિલ્મ બનાવીશું."
જોકે, અહમદ ખાને સ્પષ્ટ કર્યું હતું કે હાલમાં તેમનું સંપૂર્ણ ધ્યાન પોતાના પુત્ર અઝાન ખાનને બોલિવૂડમાં લોન્ચ કરવા પર કેન્દ્રિત છે. પ્રિયદર્શનના બહાર થયા બાદ અહમદ ખાનના આ નિવેદનથી ફેન્સમાં ફરી એકવાર 'હેરા ફેરી 3' ને લઈને ઉત્સાહ વધી ગયો છે.
