'નેતાજી' કેવી રીતે બન્યા સુભાષચંદ્ર બોઝ, 23 જાન્યુઆરીએ શા માટે ઉજવવામાં આવે છે 'પરાક્રમ દિવસ'?

આજે નેતાજી સુભાષ ચંદ્ર બોઝની 128મી જન્મજયંતિ છે. તેમનો જન્મ 23 જાન્યુઆરી 1897ના રોજ ઓડિશાના કટકમાં થયો હતો. દેશને આઝાદ કરાવવામાં નેતાજીનું મોટું યોગદાન છે. સુભાષ ચંદ્ર બોઝે સ્વતંત્રતા સંગ્રામમાં મહાત્મા ગાંધીથી અલગ રસ્તો પસંદ કર્યો અને બ્રિટિશ સરકારનો સીધો સામનો કર્યો. આ માટે તેમણે આઝાદ હિંદ ફોજની રચના કરી અને લોકોને પ્રેરણા આપવા માટે તેમણે 'તમે મને લોહી આપો, હું તમને આઝાદી આપીશ' સૂત્ર આપ્યું. દર વર્ષે તેમની જન્મજયંતિ દેશમાં 'પરાક્રમ દિવસ' તરીકે ઉજવવામાં આવે છે. પરંતુ શું તમે જાણો છો કે સુભાષ ચંદ્ર બોઝ 'નેતાજી' કેવી રીતે બન્યા અને ક્યારે તેમની જન્મજયંતિ 'પરાક્રમ દિવસ' તરીકે ઉજવવાનું શરૂ થયું? ચાલો તમને જણાવીએ.

સુભાષ ચંદ્ર બોઝ 'નેતાજી' કેવી રીતે બન્યા?

બહુ ઓછા લોકો જાણે છે કે સુભાષ ચંદ્ર બોઝને 'નેતાજી'નું બિરુદ જર્મન સરમુખત્યાર એડોલ્ફ હિટલરે આપ્યું હતું. સુભાષ ચંદ્ર બોઝ દેશની સ્વતંત્રતા માટે કંઈપણ કરવા તૈયાર હતા અને આ કારણે તેઓ જર્મની પહોંચ્યા અને સરમુખત્યાર એડોલ્ફ હિટલરને મળ્યા. દેશની આઝાદીમાં હિટલરે તેમને મદદ નહતી કરી, પરંતુ સુભાષ ચંદ્ર બોઝને મળ્યા પછી, તેઓ તેમનાથી ખૂબ પ્રભાવિત થયા અને તેથી જ તેમણે સુભાષ ચંદ્ર બોઝને 'નેતાજી' તરીકે સંબોધ્યા. આ પછી લોકો તેમને 'નેતાજી' કહેવા લાગ્યા. જોકે, 'દેશ નાયક'નું બિરુદ રવિન્દ્રનાથ ટાગોરે સુભાષ ચંદ્ર બોઝને આપ્યું હતું.

ગાંધીજીને 'રાષ્ટ્રપિતા' કહેનારા પ્રથમ વ્યક્તિ

મહાત્મા ગાંધીને દેશભરમાં 'રાષ્ટ્રપિતા' તરીકે સંબોધવામાં આવે છે, પરંતુ બહુ ઓછા લોકો જાણતા હશે કે તેમને 'રાષ્ટ્રપિતા' કહેનારા સૌપ્રથમ વ્યક્તિ નેતાજી સુભાષ ચંદ્ર બોઝ હતા. 1944માં, તેમણે સ્વતંત્રતા સંગ્રામમાં તેમના સમર્થન બદલ સિંગાપોર રેડિયો પર ગાંધીજીને આ બિરુદ આપ્યું હતું. આ પછી, તેઓ દેશ અને દુનિયામાં 'રાષ્ટ્રપિતા' તરીકે પ્રખ્યાત થયા.

પરાક્રમ દિવસની ઉજવણી ક્યારે શરૂ થઈ?

વર્ષ 2021માં, વડાપ્રધાન નરેન્દ્ર મોદીએ નેતાજી સુભાષ ચંદ્ર બોઝની જન્મજયંતીને પરાક્રમ દિવસ તરીકે ઉજવવાની જાહેરાત કરી હતી. નેતાજી સુભાષ ચંદ્ર બોઝ ભારતના એક મહાન ક્રાંતિકારી હતા. ભારતની સ્વતંત્રતામાં તેમના અભૂતપૂર્વ યોગદાનને શ્રદ્ધાંજલિ આપવા માટે દર વર્ષે તેમની જન્મજયંતિ પરાક્રમ દિવસ તરીકે ઉજવવામાં આવે છે. તેનો હેતુ નેતાજીના જીવન અને તેમના ઉપદેશોને લોકો સુધી પહોંચાડવાનો છે. આ દિવસે પશ્ચિમ બંગાળ, ઝારખંડ, ત્રિપુરા, આસામ અને ઓડિશામાં સત્તાવાર રજા હોય છે.