'રામ મંદિર પર બુલડોઝર'ની વાત કરીને ફસાયા કોંગ્રેસના પૂર્વ સાંસદ, થયો મોટો વિવાદ

દિલ્હીના પૂર્વ સાંસદ અને કોંગ્રેસના દલિત નેતા ઉદિત રાજે ફરી 'રામ મંદિર પર બુલડોઝર' બોલીને વિવાદને જન્મ આપ્યો છે. અયોધ્યામાં એક છોકરી સાથે થયેલી ગેંગરેપની ઘટના મુદ્દે તેમણે આ ટિપ્પણી કરી હતી. દાવો કરાઈ રહ્યો છે કે, યુવતી રામ મંદિરમાં સફાઈ કર્મચારી છે. જોકે, અયોધ્યા પોલીસનું કહેવું છે કે આ ઘટનાને ખોટી રીતે રજૂ કરવામાં આવી રહી છે. ઉદિત રાજની પોસ્ટ સામે ઘણા લોકોએ વાંધો દર્શાવ્યો હતો.

પૂર્વ સાંસદ ઉદિત રાજે સોશિયલ મીડિયા X પર લખ્યું, 'અયોધ્યામાં રામ મંદિરમાં સફાઈ કર્મચારી તરીકે કામ કરતી છોકરી પર સામૂહિક બળાત્કાર થયો હતો. શું રામ મંદિર પર પણ બુલડોઝર ચાલશે? કોંગ્રેસ નેતાના આ નિવેદનથી સોશિયલ મીડિયા યુઝર્સ ભડક્યા હતા અને અયોધ્યા પોલીસ પાસે કાર્યવાહીની માંગ કરી હતી. અયોધ્યા પોલીસને ટેગ કરતાં એક યુઝરે કહ્યું, 'આ વ્યક્તિ ફેક ન્યૂઝ ફેલાવીને લોકોની ભાવનાઓને ભડકાવવા અને વાતાવરણને બગાડવાનો પ્રયાસ કરી રહ્યો છે. કૃપા કરીને આને ધ્યાને લઈને યોગ્ય પગલાં ભરો. 

2024ની લોકસભા ચૂંટણીમાં કોંગ્રેસની ટિકિટ પર ચૂંટણી લડીને હારેલા ઉદિત રાજને ઘણા સોશિયલ મીડિયા યુઝર્સે અયોધ્યા પોલીસનું નિવેદન બતાવતા કહ્યું કે, આ માણસ નકલી સમાચાર ફેલાવી રહ્યો છે. ઘણા લોકોએ કહ્યું કે આ ઘટના રામ મંદિરથી લગભગ 20 કિલોમીટર દૂર બની હતી અને તેને કેટલાક પરિચિતોએ અંજામ આપ્યો હતો. આમાં રામ મંદિરને કેમ ઉમેરવામાં આવી રહ્યું છે?

અયોધ્યા પોલીસે રવિવારે એક નિવેદન જારી કરીને કહ્યું કે, કેન્ટ પોલીસ સ્ટેશન હેઠળ બળાત્કારની ઘટનાને લઈને સોશિયલ મીડિયા પર ભ્રામક સમાચાર ફેલાવવામાં આવી રહ્યા છે. અયોધ્યા પોલીસ આ વાતને નકારી રહી છે. પોલીસના જણાવ્યા મુજબ પીડિતાએ મેજિસ્ટ્રેટ સમક્ષ આપેલા નિવેદનમાં જાણવા મળ્યું છે કે, તે તેના પૂર્વ પરિચિત મિત્રને મળવા માટે અલગ-અલગ તારીખે ગઈ હતી. ત્યારે તેના સાથીઓએ તેની સાથે રેપ કર્યો હતો. 2 સપ્ટેમ્બરે કેસ નોંધવામાં આવ્યો હતો. આ ઘટનામાં બે સગીર સહિત 6 આરોપી છે. પોલીસે શારિક અને બે કિશોરોની બળાત્કારના આરોપમાં અને વિનય પાસી, શિવા સોનકર, ઉદિત સિંહ, સત્યમની શીલભંગના આરોપમાં ધરપકડ કરીને ન્યાયિક કસ્ટડીમાં મોકલી આપ્યા છે.