બંગાળમાં UCCની એન્ટ્રી? વિધાનસભામાં ઐતિહાસિક બિલ રજૂ થવાની શક્યતા

પશ્ચિમ બંગાળમાં મુખ્યમંત્રી શુભેન્દુ અધિકારી સોમવારે(29 જૂન) વિધાનસભામાં ચાર બિલ (પછાત વર્ગ કમિશન સુધારો બિલ, ગેરવસૂલી અને ગુંડાઓ પર રોક સંબંધિત બે બિલ અને OBC અનામત સુધારો બિલ) રજૂ કરે તેવી શક્યતા છે. જોકે, એવી અટકળો ચાલી રહી છે કે, યુનિફોર્મ સિવિલ કોડ (UCC) સંબંધિત બિલ સોમવારે વિધાનસભામાં રજૂ કરવામાં આવશે કે નહીં. એવી પણ શક્યતા છે કે, શુભેન્દુ અધિકારી સોમવારે વિધાનસભામાં UCC બિલ રજૂ કરી શકે છે.

આ પણ વાંચો :

સોનમ વાંગચુકની અચોક્કસ મુદ્દતની ભૂખ હડતાળ શરૂ, ખેડૂત સંગઠનોએ આપ્યું સમર્થન

VIDEO:લોહાગઢમાં સિયા ગોયલ સાથે ક્રાઇમ સીન રિકન્સ્ટ્રક્શન

તો પશ્ચિમ બંગાળ આ બિલ પસાર કરનાર દેશનું ચોથું રાજ્ય બનશે

પશ્ચિમ બંગાળમાં TMCના 15 વર્ષના શાસનનો અંત આવ્યાના બે મહિનાથી પણ ઓછા સમયમાં ભાજપ સરકાર સોમવારે વિધાનસભામાં તેના સૌથી મહત્ત્વપૂર્ણ અને રાજકીય રીતે વિવાદાસ્પદ વચનો પૂરા કરવાની તૈયારી કરી રહી છે. પછી ભલે વિરોધ પક્ષો તેનો વિરોધ કરે. ઉલ્લેખનીય છે કે, ધર્મને ધ્યાનમાં લીધા વિના લગ્ન, છૂટાછેડા, વારસો અને દત્તક લેવા માટે એક સામાન્ય નાગરિક માળખું બનાવવાની હિમાયત કરતો કાયદો જો સોમવારે બંગાળ વિધાનસભામાં રજૂ કરાય છે તો પશ્ચિમ બંગાળ આ બિલ પસાર કરનાર દેશનું ચોથું રાજ્ય બનશે.

બંગાળમાં UCCનું આગમન

ચૂંટણી પ્રચાર દરમિયાન ભાજપે ભાર મૂક્યો હતો કે બધા નાગરિકો પર સમાન નાગરિક કાયદો(UCC) લાગુ થવો જોઈએ. ચૂંટણી ઢંઢેરો બહાર પાડતા કેન્દ્રીય ગૃહમંત્રીએ વચન આપ્યું હતું કે ભાજપ સરકાર સત્તામાં આવ્યાના છ મહિનાની અંદર પશ્ચિમ બંગાળમાં UCC લાગુ કરશે, તેને ધર્મને ધ્યાનમાં લીધા વિના કાયદા સમક્ષ સમાનતા સુનિશ્ચિત કરવાના હેતુથી એક પગલું ગણાવ્યું.

શુભેન્દુ અધિકારીએ શું કહ્યું?

મુખ્યમંત્રી શુભેન્દુ અધિકારીએ શુક્રવારે વર્તમાન સત્ર દરમિયાન UCC ઔપચારિક રીતે રજૂ કરવાનો સંકેત આપ્યો હતો. તેમણે કહ્યું, "જેમ UCC ગુજરાત, ઉત્તરાખંડ અને આસામમાં લાગુ કરવામાં આવ્યું હતું, તે જ રીતે પશ્ચિમ બંગાળમાં પણ તેનો અમલ કરવામાં આવશે. હું સોમવારે વિધાનસભાને તેના વિશે જાણ કરીશ."

UCC માં આદિવાસી સમુદાય મુક્તિ અપાશે

મુખ્યમંત્રીની ટિપ્પણી પરથી સ્પષ્ટ સંકેત મળી રહ્યો છે કે, ભાજપ સરકાર તેના મુખ્ય ચૂંટણી વચનોમાંથી એક પર ઝડપથી આગળ વધવાનો અને અન્ય ભાજપ શાસિત રાજ્યોમાં અપનાવવામાં આવેલા અભિગમો પર બંગાળના માળખાને મોડેલ કરવાનો ઇરાદો ધરાવે છે. બિલ રજૂ થાય તે પહેલાં, રાજ્ય ભાજપ પ્રમુખ સમિક ભટ્ટાચાર્યએ પ્રસ્તાવ અંગેની એક મુખ્ય ચિંતા દૂર કરવાનો પ્રયાસ કરતા કહ્યું કે, 'બંધારણીય રીતે સુરક્ષિત આદિવાસી સમુદાય તેના કાર્યક્ષેત્રની બહાર રહેશે.'

બિલ પર હોબાળો, વિપક્ષે ઉઠાવ્યા સવાલો

UCC બિલનો મુદ્દો વિપક્ષી પક્ષોએ કાનૂની તેમજ રાજકીય ગણાવ્યો છે. શુક્રવારે પક્ષના ધારાસભ્યો અને વરિષ્ઠ નેતાઓ સાથેની રણનીતિ બેઠકમાં TMC અધ્યક્ષા અને પૂર્વ મુખ્યમંત્રી મમતા બેનરજીએ પાર્ટીને વિધાનસભાની અંદર અને બહાર બિલનો સખત વિરોધ કરવાનો નિર્દેશ આપ્યો અને દલીલ કરી કે આ પ્રસ્તાવ બંધારણીય નૈતિકતા, સામાજિક સર્વસંમતિ અને ભારતના બહુલવાદી પાત્ર પર ગંભીર પ્રશ્નો ઉભા કરે છે.

જો યુનિફોર્મ સિવિલ કોડ બિલ રજૂ કરવામાં આવે છે, તો વિધાનસભામાં તમામ વિપક્ષી પક્ષો તેનો વિરોધ કરશે. વિપક્ષી નેતા ઋતાબ્રત બેનરજીના નેતૃત્વમાં બળવાખોર તૃણમૂલ કોંગ્રેસે આ મુદ્દા પર રાજ્ય સરકારનો વિરોધ કરવાનો નિર્ણય લીધો છે. વધુમાં આમ જનતા ઉન્નયન પાર્ટીના પ્રમુખ અને નવાદાના ધારાસભ્ય હુમાયુ કબીર, ડોમકલના ધારાસભ્ય મુસ્તફિઝુર રહેમાન રાણા, ભારતીય સેક્યુલર ફ્રન્ટના ધારાસભ્ય નૌશાદ સિદ્દીકી અને કોંગ્રેસના બે ધારાસભ્યોએ પણ બિલનો વિરોધ કરવાનો નિર્ણય લીધો છે.