રૂ.1.55 લાખના ચલણ બાકી, સેફ્ટી સાધનો ગાયબ, ડ્રાઈવર-કંડક્ટર પી રહ્યા હતા બીડી, ગ્રેટર નોઈડા અગ્નિકાંડમાં ચોંકાવનારા ખુલાસા
છેલ્લું અપડેટ : 24 Sept 2026
ઉત્તર પ્રદેશના ગ્રેટર નોઈડા નજીક યમુના એક્સપ્રેસવે (Yamuna Expressway) પર ચાલતી સ્લીપર બસમાં લાગેલી ભીષણ આગે સમગ્ર વિસ્તારમાં ચકચાર મચાવી દીધી છે. દિલ્હીથી મહોબા જઈ રહેલી બસમાં આશરે 35 જેટલા મુસાફરો સવાર હતા. આગની ઘટનામાં અત્યાર સુધીમાં 9 લોકોનાં મોત થયા છે, જ્યારે અનેક મુસાફરો ઘાયલ થયા છે. કેટલાક મુસાફરોએ બારીમાંથી કૂદીને પોતાનો જીવ બચાવ્યો હતો. પોલીસ અને વહીવટી તંત્ર દ્વારા ઘટનાની તપાસ ચાલી રહી છે.
હવે આ દુર્ઘટનાને લઈને બસ અંગે કેટલાક ચોંકાવનારા ખુલાસા સામે આવ્યા છે. અહેવાલો અનુસાર, બસ પર અગાઉથી કુલ રૂ.1.55 લાખના ચલણ (Challans) હતા. તેમાં ઓવર સ્પીડિંગ (Over Speeding), પરમિટના નિયમોના ઉલ્લંઘન અને ખોટી પાર્કિંગ જેવા નિયમભંગનો સમાવેશ થતો હોવાનો દાવો કરવામાં આવ્યો છે.
કેવી રીતે બની હતી આ ભીષણ દુર્ઘટના?
આ અકસ્માત બુધવારે મોડી રાત્રે યમુના એક્સપ્રેસવે પર જેવર એરપોર્ટ નજીક થયો હતો. બસ દિલ્હીથી મહોબા તરફ જઈ રહી હતી. પ્રાથમિક માહિતી મુજબ બસમાં આગ લાગ્યા બાદ જોતજોતામાં આગે આખી બસને પોતાની ઝપેટમાં લઈ લીધી હતી. પોલીસના જણાવ્યા અનુસાર, બસમાં સવાર કેટલાક મુસાફરોને સુરક્ષિત રીતે બહાર કાઢવામાં આવ્યા હતા, પરંતુ અનેક લોકો આગમાં ફસાઈ ગયા હતા.
પ્રાથમિક તપાસમાં આગનું કારણ બસના એસી (AC)માં શોર્ટ સર્કિટ અથવા સ્પાર્ક હોવાનું જણાવવામાં આવ્યું છે. જોકે આગનું ચોક્કસ કારણ તપાસ પૂર્ણ થયા બાદ જ સ્પષ્ટ થશે. અધિકારીઓ દ્વારા ઘટનાસ્થળેથી પુરાવા એકત્ર કરવામાં આવ્યા છે અને બસના ડ્રાઈવર તથા કંડક્ટરને પૂછપરછ માટે કસ્ટડીમાં લેવામાં આવ્યા છે.
મુસાફરોએ આગની ગંધની જાણ કરી હોવાનો દાવો
ઘટના અંગે નોંધાયેલી ફરિયાદ (FIR)માં મુસાફર દ્વારા કરવામાં આવેલા દાવા અનુસાર, આગ લાગતા પહેલાં ડ્રાઈવર કેબિન તરફથી બળવાની ગંધ આવી રહી હતી. મુસાફરોએ ડ્રાઈવરને તેની જાણ કરી હોવા છતાં બસ તરત રોકવામાં આવી નહોતી એવો આરોપ છે. થોડા સમય બાદ ડ્રાઈવર પાસેના વિસ્તારમાં આગની જ્વાળા દેખાઈ અને ત્યારબાદ બસને રોકવામાં આવી હતી.
FIRમાં એવો પણ આરોપ કરવામાં આવ્યો છે કે ડ્રાઈવર અને કંડક્ટર કેબિનમાં બીડી તથા સિગારેટ પી રહ્યા હતા. જોકે આ તમામ બાબતો હાલ તપાસનો વિષય છે અને અંતિમ રીતે જવાબદારી નક્કી કરવા માટે તપાસના પરિણામની રાહ જોવી પડશે.
બસ પર રૂ.1.55 લાખના ચલણ હોવાનો ખુલાસો
હાદસાગ્રસ્ત બસને લઈને સામે આવેલી માહિતીમાં સૌથી ચોંકાવનારી બાબતોમાં તેનું અગાઉનું ટ્રાફિક રેકોર્ડ પણ સામેલ છે. અહેવાલ મુજબ, બસ પર કુલ રૂ.1.55 લાખના ચલણ બાકી હતા. તેમાં ઓવર સ્પીડિંગ, પરમિટના નિયમોનો ભંગ અને ખોટી જગ્યાએ પાર્કિંગ સહિતના નિયમભંગનો સમાવેશ થતો હોવાનું જણાવાયું છે.
આ ઉપરાંત બસમાં જરૂરી ફાયર સેફ્ટી સાધનો (Fire Safety Equipment) ઉપલબ્ધ હતા કે નહીં તે અંગે પણ સવાલો ઊભા થયા છે. જો બસમાં યોગ્ય અગ્નિશામક સાધનો અને સુરક્ષા વ્યવસ્થા ઉપલબ્ધ ન હોય તો આગ લાગ્યા બાદ તેને શરૂઆતના તબક્કામાં કાબૂમાં લેવી મુશ્કેલ બની શકે છે.
આગ લાગ્યા બાદ મુસાફરોમાં મચી ગઈ અફરાતફરી
બસમાં આગ લાગ્યા બાદ મુસાફરોમાં ભારે અફરાતફરી મચી ગઈ હતી. મોટાભાગના મુસાફરો રાત્રિના સમયે ઊંઘી રહ્યા હોવાથી તેમને પરિસ્થિતિ સમજવામાં સમય લાગ્યો હતો. આગ ઝડપથી ફેલાતા કેટલાક મુસાફરો બસમાંથી બહાર નીકળવા માટે બારીઓ તરફ દોડી ગયા હતા.
કેટલાક મુસાફરોએ બારીમાંથી કૂદીને પોતાનો જીવ બચાવ્યો હતો. પ્રત્યક્ષદર્શીઓના જણાવ્યા મુજબ, થોડા જ સમયમાં બસનો મોટાભાગનો હિસ્સો આગની લપેટમાં આવી ગયો હતો. આગ એટલી ભીષણ હતી કે બસનો આંતરિક ભાગ અને ટાયર પણ બળીને ખાખ થઈ ગયા હતા અને અંતે તેનો મોટાભાગે ધાતુનો ઢાંચો જ બચ્યો હતો.
પેઇન્ટ થિનર: લગેજ કમ્પાર્ટમેન્ટમાંથી જ્વલનશીલ પદાર્થ મળ્યો
તપાસકર્તાઓને બસના લગેજ કમ્પાર્ટમેન્ટમાંથી પેઇન્ટ થિનર પણ મળી આવ્યું છે. હવે અધિકારીઓ એ તપાસ કરી રહ્યા છે કે મુસાફર બસમાં આ પ્રકારનું જ્વલનશીલ પ્રવાહી લઈ જવું નિયમોનું ઉલ્લંઘન હતું કે નહીં. એફઆઈઆરમાં મુસાફરોના હવાલાથી જણાવાયું છે કે તેમને બસમાં બળવાની ગંધ અને ધુમાડો અનુભવાયો હતો. તેમણે આ અંગે ડ્રાઈવર અને હેલ્પરને જાણ કરી હતી, પરંતુ આરોપ છે કે તે સમયે તાત્કાલિક અસરકારક કાર્યવાહી કરવામાં આવી નહોતી. એફઆઈઆરમાં ડ્રાઈવર અને સ્ટાફના કેબિનમાં ધૂમ્રપાન કરવામાં આવતું હોવાનો આરોપ પણ નોંધવામાં આવ્યો છે.
9 લોકોનાં મોત, તપાસ બાદ વધુ વિગતો સામે આવશે
આ દુર્ઘટનામાં અત્યાર સુધીમાં એક મહિલા સહિત 9 લોકોનાં મોત થયાની પુષ્ટિ થઈ છે. આશરે 20 મુસાફરોને સુરક્ષિત રીતે બહાર કાઢવામાં આવ્યા હોવાની માહિતી પણ સામે આવી છે. ઘાયલોને સારવાર માટે હોસ્પિટલમાં ખસેડવામાં આવ્યા છે.
ઉત્તર પ્રદેશના મુખ્યમંત્રી યોગી આદિત્યનાથે ઘટનાની નોંધ લઈને મૃતકોના પરિવારજનો પ્રત્યે શોક વ્યક્ત કર્યો છે અને ઘાયલોને યોગ્ય સારવાર તથા અસરગ્રસ્ત પરિવારોને શક્ય તમામ મદદ પૂરી પાડવા અધિકારીઓને સૂચના આપી છે.
હાલ પોલીસ અને સંબંધિત વિભાગો બસના ફિટનેસ, પરમિટ, અગાઉના ચલણ, ફાયર સેફ્ટી વ્યવસ્થા અને આગ લાગવાના ચોક્કસ કારણ સહિતના તમામ પાસાંની તપાસ કરી રહ્યા છે. તપાસ પૂર્ણ થયા બાદ આ દુર્ઘટનામાં નિયમોના ભંગની ભૂમિકા અને જવાબદારી અંગે વધુ સ્પષ્ટતા થઈ શકે છે.
GSTVની એપ્લિકેશન ડાઉનલોડ કરો
