દિલ્હીમાં સતત ત્રીજી વાર કોંગ્રેસને એક પણ બેઠક ન મળી, 67 ઉમેદવારોની ડિપોઝીટ પણ જપ્ત

દિલ્હી વિધાનસભા ચૂંટણીના પરિણામો આવી ગયા છે. ભારતીય જનતા પાર્ટીએ 27 વર્ષ પછી દિલ્હીમાં સત્તા કબજે કરી છે. આ સાથે જ આમ આદમી પાર્ટીના 10 વર્ષના શાસનનો અંત આવ્યો છે. દિલ્હીમાં ભાજપે 70માંથી 48 બેઠકો જીતી હતી, જ્યારે આમ આદમી પાર્ટી 22 બેઠકો પર સમેટાઈ ગઈ હતી. 

આપણે કોંગ્રેસની વાત કરીએ તો, દિલ્હી વિધાનસભા ચૂંટણીમાં સતત ત્રીજી વખત કોંગ્રેસને 0 બેઠકો મળી છે. મોટી વાત એ છે કે દિલ્હીની 70માંથી 67 બેઠકો પર કોંગ્રેસની ડિપોઝીટ જપ્ત થઈ ગઈ છે. ચાલો જાણીએ કે કઈ 3 બેઠકો પર કોંગ્રેસની ડિપોઝીટ બચી ગઈ.

કોંગ્રેસના વોટ શેરમાં વધારો થયો

આ વિધાનસભા ચૂંટણીમાં કોંગ્રેસ 70માંથી ફક્ત 3બેઠકો પર જ પોતાની ડિપોઝીટ બચાવી શકી અને સતત ત્રીજી વખત ચૂંટણીમાં તેનું ખાતું પણ ખોલી શક્યું નહીં. જોકે, કોંગ્રેસે પોતાનો વોટ શેર બે ટકાથી વધુ વધાર્યો છે. તેને લગભગ 6.4 ટકા મત મળ્યા, જ્યારે 2020ની વિધાનસભા ચૂંટણીમાં 4.26 ટકા મત મળ્યા હતા. 

દિવંગત નેતા શીલા દીક્ષિતના નેતૃત્વમાં, કોંગ્રેસે 1998 (52 બેઠકો), 2003 (47 બેઠકો) અને 2008 (43 બેઠકો)માં દિલ્હીમાં સતત ત્રણ ચૂંટણીઓ જીતી હતી અને 15 વર્ષ સુધી સત્તામાં રહી હતી. જોકે, આ પછી દિલ્હીમાં કોંગ્રેસનો ગ્રાફ સતત નીચે આવતો ગયો.

આ 3 બેઠકો પર ડિપોઝિટ બચી 

જો કોઈ ઉમેદવારને ચૂંટણીમાં પડેલા કુલ મતોના ઓછામાં ઓછા છઠ્ઠા ભાગના મત ન મળે, તો તેણે ચૂંટણી પંચ સમક્ષ ડિપોઝીટ તરીકે જમા કરાવેલી રકમ જપ્ત કરવામાં આવે છે. દિલ્હીના આ ચૂંટણીમાં કોંગ્રેસના 67 ઉમેદવારોએ ડિપોઝીટ ગુમાવી છે, જયારે આ 3 બેઠક પર ડિપોઝીટ બચી ગઈ છે :

દિલ્હી કોંગ્રેસ પ્રમુખ દેવેન્દ્ર યાદવને બાદલી બેઠક પરથી કુલ 41071 મત મળ્યા. અહીં, તે ત્રીજા સ્થાને રહ્યો. તેમને 27 ટકાથી વધુ મત મળ્યા.

કસ્તુરબા નગર વિધાનસભા મતવિસ્તારના કોંગ્રેસના ઉમેદવાર અભિષેક દત્ત પણ બીજા સ્થાને રહ્યા. દત્તને 27019 મત મળ્યા. તેમને લગભગ 32 ટકા મત મળ્યા.

નાંગલોઈ જાટ બેઠક પરથી કોંગ્રેસ પાર્ટીના ઉમેદવાર રોહિત ચૌધરીને 32028 મત મળ્યા અને લગભગ 20 ટકા મત હિસ્સેદારી મળી. તે ત્રીજા સ્થાને રહ્યો.