છઠ મહાપર્વની દેશભરમાં ધામધૂમથી ઉજવણી, PM મોદીએ પાઠવી શુભકામનાઓ
વડાપ્રધાન નરેન્દ્ર મોદીએ દેશવાસીઓને છઠ મહાપર્વની શુભકામનાઓ પાઠવી છે. તેમણે સોશિયલ મીડિયા પ્લેટફોર્મ 'X' પર પોસ્ટ કરીને કહ્યું કે, “તમામ દેશવાસીઓને છઠ મહાપર્વના સંધ્યા અર્ઘ્યની હાર્દિક શુભેચ્છાઓ. પ્રકૃતિની ઉપાસનાને સમર્પિત આ પવિત્ર અવસર દરેકના જીવનમાં નવી ચેતના અને સ્ફૂર્તિ લઈને આવે. સાથે જ સમાજમાં સદભાવના અને સમરસતાને વધુ મજબૂત બનાવે. સૂર્યદેવની કૃપાથી સૌનું જીવન પ્રકાશિત થાય. જય છઠ્ઠી મૈયા!”
છઠ મહાપર્વ વિશેની મહત્ત્વપૂર્ણ માહિતી
છઠ મહાપર્વ ચાર દિવસ સુધી ચાલતો લોકઆસ્થાનો પવિત્ર તહેવાર છે. દેશભરમાં તેની ઉજવણી કરવામાં આવે છે, પરંતુ મુખ્યત્વે બિહાર, ઝારખંડ, પૂર્વી ઉત્તર પ્રદેશ (પૂર્વાંચલ) અને નેપાળના તરાઈ વિસ્તારોમાં આ પર્વનું વિશેષ મહત્ત્વ છે.
પ્રથમ દિવસ: ન્હાય-ખાય
છઠ પર્વના પ્રથમ દિવસે ઘરની સાફ-સફાઈ કરવામાં આવે છે. વ્રતધારીઓ સ્નાન કરીને શુદ્ધ શાકાહારી ભોજન ગ્રહણ કરે છે. આ દિવસે ખાસ કરીને ચણાની દાળ અને દૂધીનું શાક ખાવાની પરંપરા છે.
બીજો દિવસ: ખરના
બીજા દિવસે વ્રત રાખવામાં આવે છે. સાંજે ગોળમાંથી બનાવેલી ખીર અને રોટલીનો પ્રસાદ ગ્રહણ કરવામાં આવે છે. ત્યારબાદ 36 કલાકના નિર્જળા વ્રતની શરૂઆત થાય છે.
ત્રીજો દિવસ: સંધ્યા અર્ઘ્ય
ત્રીજા દિવસે નદી કે તળાવના ઘાટ પર જઈને અસ્ત થતા સૂર્યદેવને અર્ઘ્ય અર્પણ કરવામાં આવે છે. રાત્રે વિવિધ ધાર્મિક વિધિઓ અને અનુષ્ઠાનો કરવામાં આવે છે.
ચોથો દિવસ: ઉષા અર્ઘ્ય
ચોથા અને અંતિમ દિવસે ઉગતા સૂર્યને અર્ઘ્ય અર્પણ કરવામાં આવે છે. ત્યારબાદ પ્રસાદનું વિતરણ કરીને વ્રત પૂર્ણ કરવામાં આવે છે.
આ પર્વમાં ભગવાન સૂર્ય અને છઠ્ઠી મૈયાની પૂજા કરવામાં આવે છે. ધાર્મિક માન્યતા અનુસાર, છઠ વ્રત કરવાથી સંતાનોને દીર્ઘાયુષ્ય અને સારું સ્વાસ્થ્ય મળે છે, જ્યારે પરિવારની સુખ-સમૃદ્ધિ માટે પણ આશીર્વાદ પ્રાપ્ત થાય છે. આ પર્વ કારતક માસના શુક્લ પક્ષની છઠ્ઠી તિથિએ ઉજવવામાં આવે છે.
દેશ-વિદેશમાં વધી રહી છે છઠ મહાપર્વની લોકપ્રિયતા
છેલ્લા કેટલાક સમયથી છઠ મહાપર્વની ઉજવણીનો વ્યાપ દેશના અન્ય વિસ્તારો ઉપરાંત વિદેશોમાં પણ વધ્યો છે. બિહાર, ઝારખંડ અને પૂર્વી ઉત્તર પ્રદેશમાંથી અન્ય રાજ્યો તથા વિદેશમાં સ્થાયી થયેલા લોકો પણ આ પર્વની પરંપરાઓ જાળવી રાખીને તેની ઉજવણી કરે છે. આમ, લોકઆસ્થાનો આ પવિત્ર તહેવાર હવે માત્ર અમુક વિસ્તારો પૂરતો મર્યાદિત રહ્યો નથી, પરંતુ વિશ્વભરમાં પોતાની આગવી ઓળખ સ્થાપિત કરી રહ્યો છે.
