ભાજપ બહુમતથી દૂર, NDAને તોડવામાં લાગી કોંગ્રેસ, નીતિશ અને TDP સાથે સંપર્ક સાધવાના પ્રયાસ શરૂ

લોકસભા ચૂંટણીના પરિણામોની રાહ હવે ખૂબ જ રસપ્રદ જોવા મળી રહી છે. અત્યાર સુધીના વલણો દર્શાવે છે કે, ભાજપ બહુમતથી દૂર છે. આવી સ્થિતિમાં કોંગ્રેસ સક્રિય બની છે અને એનડીએ ગઠબંધન સાથીદારોને રીઝવવાના પ્રયાસો શરૂ કરી દીધા છે. સૂત્રોના જણાવ્યા અનુસાર કોંગ્રેસે જેડીયુ નેતા લલન સિંહનો સંપર્ક કર્યો છે. તેમજ ટીડીપીને ઈન્ડિયા એલાયન્સમાં લાવવાના પ્રયાસો ચાલુ છે. અહેવાલ છે કે, સોનિયા ગાંધીના સારથી કે.સી. વેણુગોપાલે ટીડીપી ચીફ ચંદ્રબાબુ નાયડુના પુત્ર નારા લોકેશ સાથે વાત કરી છે.

જો આપણે અત્યાર સુધીના વલણો પર નજર કરીએ, તો ભવિષ્યના સમીકરણો ખૂબ જ રસપ્રદ લાગે છે. સમાચાર લખાય છે ત્યાં સુધી NDA 297 સીટો પર આગળ છે. જોકે, ભાજપ માત્ર 242 સીટો પર લીડ ધરાવે છે. આવી સ્થિતિમાં, આગામી સરકાર બનાવવામાં ગઠબંધન ભાગીદારોની ભૂમિકા ખૂબ જ મહત્ત્વપૂર્ણ બની જાય છે. અહીં ટીડીપી 16 સીટો પર આગળ છે, જ્યારે નીતિશ કુમારની જેડીયુ 15 સીટો પર આગળ છે. આ સિવાય એલજેપી 5 સીટો પર, શિવસેના 7 સીટો પર અને જેએસપી 2 સીટો પર આગળ ચાલી રહી છે.

જો ઈન્ડિયા એલાયન્સની વાત કરીએ તો તે 225 સીટો પર આગળ છે. આમાં કોંગ્રેસ 96 સીટો પર આગળ છે. ગત વખતની સરખામણીએ તેની 41 બેઠકો વધી રહી હોય તેવું લાગી રહ્યું છે. ગઠબંધનના અન્ય સહયોગીઓમાં, સમાજવાદી પાર્ટી 33 બેઠકો પર આગળ છે, TMC 31 બેઠકો પર, DMK 21 પર, NCP 7 પર, UBT 9 બેઠકો પર, 4 બેઠકો પર RJD અને 4 બેઠકો પર CPM આગળ છે.

જો અત્યાર સુધી જોવા મળતા વલણો સમાન પરિણામોમાં પરિવર્તિત થાય છે, તો આ નાના ગઠબંધન ભાગીદારોનું મહત્ત્વ નોંધપાત્ર રીતે વધી જશે અને કદાચ આ જ કારણ છે કે, કોંગ્રેસ JDU અને TDPને તેમની સાથે લાવવામાં વ્યસ્ત છે. આ બંને પાર્ટીઓ અગાઉ વિપક્ષી ગઠબંધનનો હિસ્સો રહી ચુકી છે અને ઘણી વખત પોતપોતાનું વલણ બદલવાને કારણે ચર્ચામાં રહી છે.