VIDEO: "બંગાળની સ્થિતિ UP કરતાં પણ ખરાબ..." રેલી પર હુમલા બાદ પોલીસ અને ભાજપ પર ભડક્યા મમતા બેનર્જી
છેલ્લું અપડેટ : 08 Jul 2026
પશ્ચિમ બંગાળના પૂર્વ મુખ્યમંત્રી મમતા બેનર્જીએ રાજ્યની કાયદો અને વ્યવસ્થાની સ્થિતિને લઈને પોલીસ પ્રશાસન અને ભાજપ પર આકરા પ્રહારો કર્યા છે. તેમણે આરોપ લગાવ્યો છે કે રાજ્યમાં મહિલાઓ પર અત્યાચારો થઈ રહ્યા છે અને પોલીસ સામાન્ય જનતાને સુરક્ષા આપવામાં સંપૂર્ણપણે નિષ્ફળ રહી છે.
મમતા બેનર્જીએ ગુસ્સો વ્યક્ત કરતા જણાવ્યું કે, "અમે બધા જાણીએ છીએ કે તમે કેવી રીતે સત્તામાં આવ્યા છો. અહીં પોલીસ અમારા પર નજર રાખી રહી છે, પરંતુ જ્યાં મહિલાઓ પર અત્યાચાર થઈ રહ્યા છે ત્યાં પોલીસ ક્યાંય જોવા મળતી નથી. કાલિઘાટ અને મારા નિવાસસ્થાનથી લઈને બેલીગંજ સુધીના સમગ્ર વિસ્તારમાં તોડફોડ અને અરાજકતાનો માહોલ છે. શું બંગાળની જનતા આવો જ બદલાવ ઈચ્છતી હતી?"
કોર્ટની મંજૂરી છતાં રેલી પર હુમલો
મમતા બેનર્જીએ કહ્યું કે, "અમારે રેલીઓ યોજવા માટે પણ કોર્ટની પરવાનગી લેવી પડે છે. હાઈકોર્ટની મંજૂરી મેળવ્યા પછી જ અમે રેલી યોજી હતી, છતાં તમે જોયું કે લોકો પર કેવી રીતે હુમલા કરવામાં આવ્યા. જેઓ રામના નામે પૈસા લૂંટે છે તેમણે શરમ આવવી જોઈએ... રામનું નામ બદનામ ન કરો. હાઈકોર્ટે અમને પરવાનગી આપી હતી; આ ઘટના માટે હું ભાજપને નહીં, પણ પોલીસ અને વહીવટીતંત્રને જવાબદાર માનું છું."
પોલીસ પર લગાવ્યો બેદરકારીનો આરોપ
પોલીસ તંત્રની કામગીરી પર સવાલ ઉઠાવતા પૂર્વ મુખ્યમંત્રીએ કહ્યું, "જો વહીવટીતંત્ર ઈચ્છત તો રેલી શાંતિપૂર્ણ રીતે આગળ વધી શકી હોત, પરંતુ તમે ભાજપના કાર્યકરોને ગુંડાગીરી કરવાની છૂટ આપી. અહીં કાયદો અને વ્યવસ્થા સંપૂર્ણપણે પડી ભાંગી છે. અહીંની સ્થિતિ ઉત્તર પ્રદેશ કરતાં પણ વધુ ખરાબ છે. રેલી માટે હાઈકોર્ટની મંજૂરી હોવા છતાં પોલીસે તેનું ઉલ્લંઘન કેવી રીતે થવા દીધું? આ કોર્ટના તિરસ્કાર (contempt of court) સમાન છે. તેઓ લોકોને સુરક્ષા આપવામાં નિષ્ફળ રહ્યા છે અને માત્ર અમારા કાર્યકરો પર હુમલા કરી રહ્યા છે. હું ભાજપની આ હરકતોની સખત શબ્દોમાં નિંદા કરું છું."
