Bengal news: મારી જ કાર ચેક કરો છો, PMની કેમ નથી કરતા? ચૂંટણી પંચ પર ભડક્યા મમતા બેનરજી
છેલ્લું અપડેટ : 16 Apr 2026
પશ્ચિમ બંગાળમાં 23 અને 29 એપ્રિલે મતદાન યોજાય તે પહેલા જોરદાર રાજકીય ગરમાવો ચાલી રહ્યું છે. અવારનવાર ભાજપ અને ચૂંટણી પંચ પર આકરા પ્રહારો કરતા મુખ્યમંત્રી મમતા બેનરજીએ ફરી બંને પર ગંભીર આક્ષેપ કર્યો છે. તેમણે બુધવારે ઈસ્લામપુરમાં જનસભા સંબોધતી વખતે કહ્યું છે કે, ‘મારી ગાડી ચેક કરો, જો હિમ્મત હોય તો વડાપ્રધાનની ગાડી કેમ ચેક કરતા નથી.’ તેમણે આક્ષેપ કર્યો કે, ‘ભાજપ કેન્દ્રીય એજન્સીઓનો ઉપયોગ કરીને TMC નેતાઓ અને કાર્યકર્તાઓને ડરાવવાનું અને દબાણ કરવાનું રાજકારણ રમી રહી છે.’
મમતાના વાહનની તપાસ કરવામાં આવી
મમતા બેનરજી (CM Mamata Banerjee)ના જણાવ્યા મુજબ, દમદમ એરપોર્ટ પાસે તેમના વાહનની તપાસ કરવામાં આવી છે. તેમણે કહ્યું કે, મારી પાસે છુપાવવા માટે કંઈ નથી. તેમણે સવાલ કર્યો છે કે, ‘માત્ર પસંદગીના નેતાઓઓને જ ટાર્ગેટ કેમ કરવામાં આવી રહ્યા છે? ભાજપનું રાજકારણ માત્ર ચૂંટણી સુધી મર્યાદિત નથી, પરંતુ તેઓ બંગાળને અસ્થિર કરવાનો પ્રયાસ કરી રહ્યા છે.’
તેમણે ભાજપને ચેતવણી આપતા કહ્યું કે, ‘ધરપકડ કરવાની ધમકી અને ડરાવવાની રણનીતિ અહીં નહીં ચાલે.’ તેમણે દાવો કર્યો કે, કેન્દ્રીય દળે કોલકાતા એરપોર્ટ જતી વખતે તેમના વાહનને અટકાવ્યા હતા અને તપાસ કરવાનો પ્રયાસ કર્યો હતો. તેમણે આક્ષેપ કર્યો કે, પશ્ચિમ બંગાળ ચૂંટણી જીતવા માટે ભાજપ કેન્દ્ર સરકારની મશીનરીનો મોટાપાયે દુરુપયોગ કરી રહ્યું છે. પશ્ચિમ બંગાળની 294 બેઠકો માટે 23 અને 29 એપ્રિલે બે તબક્કામાં મતદાન યોજાવાનું છે, જ્યારે ચોથી મેએ પરિણામ જાહેર થવાનું છે.
અભિષેક બેનરજીને પણ વારંવાર અટકાવાયા
તૃણમૂલ કોંગ્રેસ (TMC)એ એક દિવસ પહેલા આક્ષેપ કર્યો છે કે, ચૂંટણી પંચ ટીએમસીના ટોચના નેતાઓને ટાર્ગેટ કરી રહી છે અને તેઓએ તેમના વાહનોની કડકાઈથી તપાસ કરવાનો આદેશ અપાયો છે. સુરક્ષા કર્મચારીઓ દ્વારા ટીએમસીના નેતાઓ ખાસ કરીને અભિષેક બેનરજીને વારંવાર અટકાવી રહ્યા છે. રાજ્યમાં પાર્ટી મહાસચિવ કુણાલ ઘોષે આક્ષેપ કર્યો કે, ચૂંટણી પંચે પોતાની ફ્લાઈંગ સ્ક્વૉડને આદેશ આપ્યો છે કે, ટીએમસીના તમામ નેતાઓ અને મંત્રીઓના વાહનો જાહેરમાં તપાસમાં આવે.
GSTVની એપ્લિકેશન ડાઉનલોડ કરો
