બંગાળ સરકારે એરફોર્સના બે એરબેઝને આપી 62 એકર જમીન, ચીન સરહદ નજીક ભારતની વધશે તાકાત
છેલ્લું અપડેટ : 22 Jun 2026
પૂર્વ ભારતની હવાઈ સુરક્ષા વ્યવસ્થાને વધુ અભેદ્ય બનાવવા માટે પશ્ચિમ બંગાળની શુભેન્દુ અધિકારી સરકારે એક મોટો નિર્ણય લીધો છે. સરકારે વાયુસેનાના હસીમારા એર ફોર્સ સ્ટેશન માટે 25 એકર અને કલાઈકુંડા એર ફોર્સ સ્ટેશન માટે 37 એકર જમીન ફાળવવાની મંજૂરી આપી દીધી છે. આ જમીનનો ઉપયોગ બંને એરબેઝના ઈન્ફ્રાસ્ટ્રક્ચરના વિસ્તરણ, નવી સુવિધાઓ અને ભવિષ્યની સૈન્ય જરૂરિયાતો પૂરી કરવા માટે કરવામાં આવશે, જે ચીન સરહદ નજીક ભારતની સંરક્ષણ શક્તિને નવી તાકાત આપશે.
હસીમારા એરબેઝ : રાફેલ ફાઈટર જેટ અને S-400નો અભેદ્ય ગઢ
અલીપુરદ્વાર જિલ્લામાં ભૂતાન સરહદ નજીક આવેલું હસીમારા એરબેઝ ભારતીય વાયુસેનાનું અત્યંત મહત્વનું ફોરવર્ડ બેઝ છે. અહીં રાફેલ ફાઈટર એરક્રાફ્ટની બીજી સ્ક્વાડ્રન તૈનાત છે, જે ભારત-ચીન સરહદ પર દેશની લડાયક ક્ષમતા વધારે છે. આ એરબેઝ પર લાંબી દૂરીની અત્યાધુનિક S-400 ટ્રાયમ્ફ એર ડિફેન્સ સિસ્ટમ પણ સક્રિય હોવાના અહેવાલ છે, જે 400 કિલોમીટર દૂરથી જ દુશ્મનના વિમાન, મિસાઈલ કે ડ્રોનને તોડી પાડવા સક્ષમ છે. આ એરબેઝ સિલીગુડી કોરિડોર અને પૂર્વી હિમાલય ક્ષેત્રની સુરક્ષામાં મહત્વની ભૂમિકા ભજવે છે. નવી જમીન મળવાથી અહીં રનવે, હેંગર અને સૈનિકોના આવાસની સુવિધાઓ સારી બનશે.
કલાઈકુંડા એરબેઝ: ટ્રેનિંગ અને સૈન્ય ઓપરેશનનું મુખ્ય કેન્દ્ર
પશ્ચિમ મેદિનીપુર જિલ્લામાં આવેલું કલાઈકુંડા એરબેઝ પૂર્વીય એર કમાન્ડ હેઠળનું મોટું ફાઈટર અને ટ્રેનિંગ હબ છે, જ્યાં સુખોઈ-30 MKI અને હૉક ટ્રેનર એરક્રાફ્ટ તૈનાત રહે છે. સિંગાપોર એર ફોર્સ સહિતની આંતરરાષ્ટ્રીય દ્વિપક્ષીય હવાઈ કવાયતો માટે આ બેઝ જાણીતો છે. અહીં આશરે 10,000 ફૂટ લાંબો રનવે છે, જે ફાઈટર અને ટ્રાન્સપોર્ટ બંને પ્રકારના એરક્રાફ્ટ માટે સક્ષમ છે. અહીં મળેલી 37 એકર જમીનથી લોજિસ્ટિક્સ, જાળવણી અને સપોર્ટ સિસ્ટમમાં મોટો વધારો થશે.
