અમદાવાદની અરવિંદ મિલ્સ હવે પૂર્વાંચલમાં, PM મોદીએ મેન્યુફેક્ચરિંગ પ્લાન્ટનું કર્યું ઉદ્ઘાટન
અમદાવાદ સ્થિત ટેક્સટાઇલ કંપની અરવિંદ લિમિટેડના વારાણસીના મિર્ઝામુરાદના ખોચવાનમાં આવેલા પ્રથમ મેન્યુફેક્ચરિંગ પ્લાન્ટનું વડાપ્રધાન નરેન્દ્ર મોદીએ રવિવારે ઉદ્ઘાટન કર્યું હતું. આશરે ₹150 કરોડના ખર્ચે તૈયાર કરવામાં આવેલી આ ફેક્ટરીથી હજારો લોકોને રોજગારી મળવાની અપેક્ષા છે. ખાસ કરીને સ્થાનિક મહિલાઓને રોજગારી આપવામાં પ્રાથમિકતા આપવામાં આવી છે.
ઉદ્ઘાટન બાદ વડાપ્રધાન મોદીએ મિલના અધિકારીઓ સાથે વાતચીત કરી હતી અને ત્યાં તૈયાર કરવામાં આવતા કાપડ વિશે જાણકારી મેળવી હતી. તેમણે ખાદીમાંથી બનાવવામાં આવતા કાપડ સહિત વિવિધ પ્રકારનાં ફેબ્રિક્સ અને તેના ઉત્પાદનમાં વપરાતી સામગ્રી વિશે પણ પૂછપરછ કરી હતી.
'તમારી આવડત, તમારી ઓળખ'
વડાપ્રધાને 'તમારી આવડત, તમારી ઓળખ' (અપના હુનર, અપની પહેચાન) વિષય પર ભાર મૂક્યો હતો. આ દરમિયાન તેમણે ફેક્ટરીમાં કામ કરતી મહિલાઓ સાથે સંવાદ કર્યો હતો અને તેઓ કઈ રીતે કામ કરે છે તેમજ કામ દરમિયાન કયા પડકારોનો સામનો કરે છે તે અંગે વિગતવાર માહિતી મેળવી હતી. આ ઉપરાંત તેમણે અરવિંદ મિલ્સ દ્વારા ઉત્પાદિત કાપડનું પ્રદર્શન પણ નિહાળ્યું હતું.
આશરે 7થી 8 એકરમાં ફેલાયેલી આ ફેક્ટરીનું નિર્માણ લગભગ ₹150 કરોડના ખર્ચે કરવામાં આવ્યું છે. ઉત્તર પ્રદેશ સરકારના નિવેદન અનુસાર, વડાપ્રધાને એકમમાં તાલીમ લઈ રહેલી મહિલાઓ સાથે સીધો સંવાદ પણ કર્યો હતો.
પૂર્વાંચલ ક્ષેત્રના હજારો લોકોને રોજગારી મળશે
ઉત્તર પ્રદેશ સરકારના નિવેદનમાં જણાવાયું હતું કે આ ઔદ્યોગિક એકમ માત્ર સ્થાનિક વિસ્તારના જ નહીં, પરંતુ સમગ્ર પૂર્વાંચલ ક્ષેત્રના હજારો લોકોને રોજગારી પૂરી પાડશે. સ્થાનિક મહિલાઓને ખાસ પ્રાથમિકતા આપવામાં આવી છે. અત્યાર સુધીમાં 300થી વધુ મહિલાઓની ભરતી કરવામાં આવી છે અને હાલમાં તેમને ફેક્ટરીમાં તાલીમ આપવામાં આવી રહી છે. આ પહેલથી ટેક્સટાઇલ અને ગાર્મેન્ટ મેન્યુફેક્ચરિંગ ક્ષેત્રને વધુ મજબૂતી મળશે.
પૂર્વાંચલ ક્ષેત્રમાં અરવિંદ મિલ્સનો પ્રથમ મોટો મેન્યુફેક્ચરિંગ પ્લાન્ટ
અરવિંદ મિલ્સ દ્વારા પૂર્વાંચલ ક્ષેત્રમાં સ્થાપિત કરવામાં આવેલો આ પ્રથમ મોટો મેન્યુફેક્ચરિંગ પ્લાન્ટ છે. સરકારી નિવેદન અનુસાર, પ્લાન્ટની કામગીરી શરૂ થયા બાદ બે તબક્કામાં તેનો વિસ્તાર કરવામાં આવશે, જેના પરિણામે હજારો નવી રોજગારીની તકો ઊભી થશે.
કાશીમાં સ્થિત આ નવા પ્લાન્ટમાં સ્પોર્ટ્સવેર અને અન્ડરગાર્મેન્ટ્સ સહિતનાં વિવિધ ઉત્પાદનો તૈયાર કરવામાં આવશે. અહીં ઉત્પાદિત થતી વસ્તુઓ અનેક મોટી બહુરાષ્ટ્રીય કંપનીઓની બ્રાન્ડ્સ માટે બનાવવામાં આવશે.
ફેક્ટરીના ઉદ્ઘાટન બાદ વડાપ્રધાન નરેન્દ્ર મોદીએ નમો ઘાટ ખાતે યોજાયેલા ત્રણ દિવસીય એર શોના ભવ્ય સમાપન સમારોહનું નિરીક્ષણ કર્યું હતું. આ કાર્યક્રમમાં ઉત્તર પ્રદેશનાં રાજ્યપાલ આનંદીબેન પટેલ, મુખ્યમંત્રી યોગી આદિત્યનાથ અને અન્ય મહાનુભાવો વડાપ્રધાનની સાથે ઉપસ્થિત રહ્યા હતા. આ પહેલાં, વડાપ્રધાન નરેન્દ્ર મોદી ખોચવાન (મિર્ઝામુરાદ) ખાતે આવેલા હેલિપેડ પર પહોંચ્યા ત્યારે ઉત્તર પ્રદેશનાં રાજ્યપાલ આનંદીબેન પટેલ અને મુખ્યમંત્રી યોગી આદિત્યનાથે તેમનું સ્વાગત કર્યું હતું.
