‘મીડિયાનું ધ્યાન ખેંચવા માટે અરજી કરી છે?’ રાહુલ ગાંધીની સંપત્તિના કેસમાં CJI સૂર્યકાંતની વકીલને ફટકાર
કોંગ્રેસના નેતા રાહુલ ગાંધી સામે આવક કરતાં વધુ સંપત્તિ હોવાના આરોપો સાથે જોડાયેલો મામલો મંગળવારે સુપ્રીમ કોર્ટમાં ભારતના મુખ્ય ન્યાયાધીશ (CJI) સૂર્યકાંતની અધ્યક્ષતાવાળી બેન્ચ સમક્ષ આવ્યો હતો. આ દરમિયાન CJIએ અરજી રજૂ કરનારા વકીલની દલીલો સામે સવાલો ઉઠાવ્યા હતા અને પૂછ્યું હતું કે શું આ મુદ્દો માત્ર મીડિયાનું ધ્યાન ખેંચવા માટે ઉઠાવવામાં આવી રહ્યો છે? CJI સૂર્યકાંતે સ્પષ્ટ શબ્દોમાં જણાવ્યું હતું કે આ મુદ્દો ઉઠાવવા પાછળ ન તો કોઈ સ્પષ્ટ આધાર દેખાય છે કે ન તો તેમાં કોઈ ખાસ દમ જણાય છે. સુપ્રીમ કોર્ટે અગાઉ આ કેસમાં અલ્હાબાદ હાઈકોર્ટના આદેશ પર વચગાળાની રોક લગાવી હતી. સાથે જ એન્ફોર્સમેન્ટ ડિરેક્ટોરેટ (ED) અને સેન્ટ્રલ બ્યુરો ઑફ ઇન્વેસ્ટિગેશન (CBI)ને હાઈકોર્ટ સમક્ષ કોઈ પણ અહેવાલ રજૂ ન કરવા નિર્દેશ આપ્યો હતો.
‘મીડિયાનું ધ્યાન ખેંચવા માટે અરજી કરી છે?’
સુનાવણી દરમિયાન વકીલે દાવો કર્યો હતો કે રાહુલ ગાંધીએ તાજેતરમાં એક કાર્યક્રમમાં કહ્યું હતું કે તેઓ ED અને CBIના 200 અધિકારીઓના સંપર્કમાં છે. આ દલીલના આધારે વકીલે સુપ્રીમ કોર્ટને આ મામલો સુનાવણી માટે સૂચિબદ્ધ કરવાની માગ કરી હતી. આ દલીલ સાંભળ્યા બાદ CJI સૂર્યકાંતે વકીલને પૂછ્યું હતું કે શું તેમણે આ અંગે કોઈ ન્યૂઝ ચેનલની સલાહ લીધી છે? તેમણે સવાલ કર્યો હતો કે શું વકીલ માત્ર મીડિયાનું ધ્યાન ખેંચવા માટે આ મુદ્દો ઉઠાવવા માગે છે?
અલ્હાબાદ હાઈકોર્ટે તપાસનો આદેશ આપ્યો હતો
આ કેસમાં મે મહિનામાં અલ્હાબાદ હાઈકોર્ટની લખનઉ બેન્ચે રાહુલ ગાંધીની સંપત્તિની તપાસ કરવાનો આદેશ CBI અને EDને આપ્યો હતો. જોકે, ઓગસ્ટ મહિનામાં સુપ્રીમ કોર્ટે હાઈકોર્ટના આ આદેશ પર વચગાળાની રોક લગાવી દીધી હતી. સુપ્રીમ કોર્ટે આ મામલે ફરિયાદી, CBI અને ED પાસેથી જવાબ પણ માગ્યા હતા. હાલ હાઈકોર્ટના તપાસના આદેશ પર રોક યથાવત્ છે.
કર્ણાટકના ભાજપના કાર્યકરની ફરિયાદથી શરૂ થયો હતો મામલો
રાહુલ ગાંધીની સંપત્તિ અંગેનો આ સમગ્ર મામલો કર્ણાટકના ભાજપના કાર્યકર વિઘ્નેશ શિશિરની ફરિયાદથી શરૂ થયો હતો. તેમણે રાહુલ ગાંધીની સંપત્તિ અંગે અનેક આક્ષેપો કર્યા હતા. રાહુલ ગાંધીએ અલ્હાબાદ હાઈકોર્ટના આદેશને સુપ્રીમ કોર્ટમાં પડકાર્યો હતો અને આ કેસ દિલ્હી હાઈકોર્ટમાં ટ્રાન્સફર કરવાની માગ કરી હતી. હવે આ મામલે આગળની કાનૂની કાર્યવાહી અને સુપ્રીમ કોર્ટના નિર્દેશો મહત્ત્વપૂર્ણ રહેશે.
