પુતિન પછી હવે ડોનાલ્ડ ટ્રમ્પે પીએમ મોદીના વખાણ કર્યા, 'અમે ભારતથી ખૂબ પૈસા કમાઈ રહ્યા છીએ'

અમેરિકાના રાષ્ટ્રપતિ ડોનાલ્ડ ટ્રમ્પે વડા પ્રધાન નરેન્દ્ર મોદીની પ્રશંસા કરી છે અને તેમને એક સારા મિત્ર ગણાવ્યા છે. તેમણે કહ્યું છે કે ભારત અને અમેરિકા વચ્ચે ટૂંક સમયમાં વેપાર કરાર થશે. વ્હાઇટ હાઉસ ખાતે પત્રકારો સાથે વાત કરતા ટ્રમ્પે કહ્યું, "મને વડા પ્રધાન મોદી ખૂબ ગમે છે. તેઓ મારા સારા મિત્ર છે. અમારા સારા સંબંધો છે, અને અમે ટૂંક સમયમાં એક કરાર કરીશું."

 

જોકે, ટ્રમ્પે એ પણ નોંધ્યું હતું કે ભારત વર્ષોથી અમેરિકન કંપનીઓ પર ઊંચા ટેરિફ લાદી રહ્યું છે. તેમણે ટિપ્પણી કરી હતી કે ભારતે અમેરિકન કંપનીઓ પર ભારે ટેરિફ લાદ્યો છે, જ્યારે અમેરિકાએ ભારત પર સમાન ડ્યુટી લાદી નથી. એક દિવસ અગાઉ, રશિયન રાષ્ટ્રપતિ વ્લાદિમીર પુતિને પણ પીએમ મોદીની પ્રશંસા કરી હતી. પીએમ મોદી અને ટ્રમ્પ આ મહિને ફ્રાન્સમાં મળી શકે છે; બંને નેતાઓ 15 થી 17 જૂન સુધી ચાલનારા G7 સમિટમાં ભાગ લેવાના છે.

'ભારતે વર્ષો સુધી ફાયદો ઉઠાવ્યો, પણ હવે સ્થિતિ ઉલટી'

ભૂતકાળના વ્યાપારી સમીકરણોનો ઉલ્લેખ કરતા ડોનાલ્ડ ટ્રમ્પે જણાવ્યું કે, "ઘણા વર્ષો સુધી ભારતે અમેરિકાનો ફાયદો ઉઠાવ્યો છે. તેઓ અમારા સામાન પર ભારે ટેક્સ (ટેરિફ) લગાવતા હતા અને બદલામાં પોતે કશું ચૂકવતા નહોતા. હું આના માટે ભારતને દોષ નથી આપતો, પરંતુ અમેરિકાના જૂના નેતાઓને દોષ આપું છું કારણ કે આપણે બેવકૂફ હતા. જોકે, હવે સ્થિતિ સંપૂર્ણપણે બદલાઈ ગઈ છે અને અમે ભારત સાથેના વ્યાપારમાંથી ઘણો નફો કમાઈ રહ્યા છીએ."

પીએમ મોદી સાથેની કેમિસ્ટ્રી લાવશે રંગ

ભૂતકાળના વ્યાપારિક ભેદભાવો અને ટેક્સના વિવાદો છતાં ટ્રમ્પે ભવિષ્યમાં ભારત સાથે બહેતર કરાર થવાનો પૂરો ભરોસો આપ્યો હતો. તેમણે આનો સંપૂર્ણ શ્રેય પીએમ નરેન્દ્ર મોદી સાથેની પોતાની અંગત મિત્રતાને આપતા કહ્યું કે, "આ બધી વાતો પછી પણ અમે ભારત સાથે વ્યાપાર સમજૂતી કરી લઈશું. તેનું કારણ એ છે કે મને તમારા વડાપ્રધાન નરેન્દ્ર મોદી ખૂબ ગમે છે. તે મારા ખૂબ સારા મિત્ર છે અને અમારી વચ્ચે ખૂબ જ મજબૂત અને બહેતર સંબંધો છે."

બીજી તરફ નવો 'ટેરિફ બોમ્બ' ફોડવાની તૈયારી!

ટ્રમ્પના આ મધુર નિવેદનની વચ્ચે જ અમેરિકા તરફથી ભારત સહિત અન્ય દેશો પર નવો ટેક્સ લાદવાનો પ્રસ્તાવ પણ સામે આવ્યો છે. અમેરિકાના વ્યાપાર પ્રતિનિધિ કાર્યાલય (USTR) દ્વારા ભારત, ચીન, રશિયા, ઓસ્ટ્રેલિયા, ઇઝરાયેલ, જાપાન અને કતાર સહિત 54 દેશોની એક યાદી બહાર પાડવામાં આવી છે. આ યાદીમાં આરોપ લગાવાયો છે કે આ દેશોમાં 'જબરન મજૂરી' (Forced Labor) થી બનેલી વસ્તુઓની આયાત રોકવા માટેના કાયદાઓ કડક રીતે લાગુ કરવામાં આવ્યા નથી.