ગેંગસ્ટર આનંદપાલ એન્કાઉન્ટરમાં પોલીસકર્મીઓ વિરુદ્ધ ચાલશે હત્યાનો કેસ, કોર્ટનો આદેશ

રાજસ્થાનના ચર્ચિત ગેંગસ્ટર આનંદપાલ સિંહના એન્કાઉન્ટર કેસમાં એક નવો વળાંક સામે આવ્યો છે. આ કેસમાં જોધપુર કોર્ટે સીબીઆઈનો ક્લોઝર રિપોર્ટ ફગાવી દીધો છે. એસીજેએસ સીબીઆઈ કોર્ટે આ એન્કાઉન્ટરમાં સામેલ 5 પોલીસકર્મીઓ વિરુદ્ધ કાર્યવાહી કરી છે. કોર્ટે એન્કાઉન્ટરમાં સામેલ પોલીસકર્મીઓ સામે કલમ 302 હેઠળ કેસ કરવાનો આદેશ આપ્યો છે.

ગેંગસ્ટરના એન્કાઉન્ટર બાદ તેના પરિવારજનોએ તેને નકલી એન્કાઉન્ટર ગણાવીને કોર્ટમાં પડકાર્યો હતો.  જ્યારે સીબીઆઈએ આ કેસમાં ક્લોઝર રિપોર્ટ કોર્ટને આપ્યો હતો. આ રિપોર્ટમાં નકલી એન્કાઉન્ટરની વાતને નકારી કાઢવામાં આવી હતી. પરંતુ આનંદપાલની પત્નીના વકીલે દલીલ કરી હતી કે આનંદપાલના શરીર પર ઈજાના નિશાન છે. તેમજ અન્ય પુરાવા પણ સાબિત કરે છે કે તે નકલી એન્કાઉન્ટર હતું. જે બાદ કોર્ટે એન્કાઉન્ટરમાં સામેલ તત્કાલીન ચુરુ એસપી રાહુલ બારહટ, તત્કાલીન એડિશનલ એસપી વિદ્યા પ્રકાશ ચૌધરી, ડીએસપી સૂર્યવીર સિંહ રાઠોડ, આરએસી હેડ કોન્સ્ટેબલ કૈલાશ સામે કેસ ચલાવવાનો આદેશ આપ્યો છે.

આનંદપાલનું એન્કાઉન્ટર 24 જૂન 2017ના રોજ થયું હતું

ઉલ્લેખનીય છે કે,  આનંદપાલનું એન્કાઉન્ટર 24 જૂન 2017ના રોજ થયું હતું. પરિવાર તરફથી આ એન્કાઉન્ટરને નકલી ગણાવીને કેસ નોંધવામાં આવ્યો હતો.