24 માળની લક્ઝરી હોટલના સ્વિમિંગ પૂલમાં મોતનો ખેલ, બે વિદેશી નાગરિકોનાં કરંટથી મોત
બેંગલુરુની એક ફાઇવ સ્ટાર હોટલમાં શુક્રવારે સાંજે ચોંકાવનારી ઘટના બની હતી. હોટલના સ્વિમિંગ પૂલમાં કથિત રીતે વીજ કરંટ લાગતાં બે વિદેશી નાગરિકોનાં મોત નીપજ્યાં હતાં. મૃતકોમાં એક જર્મન અને એક સ્લોવાકિયન નાગરિકનો સમાવેશ થાય છે. બંનેને બચાવવાનો પ્રયાસ કરતી વખતે અન્ય બે લોકો પણ વીજ કરંટની ઝપેટમાં આવતાં ઘાયલ થયા હતા. આ ઘટનાને પગલે હોટલની સુરક્ષા વ્યવસ્થા અને સંભવિત બેદરકારી અંગે સવાલો ઊભા થયા છે.આ ઘટના બેંગલુરુની 24 માળની લક્ઝરી ફાઇવ સ્ટાર કોનરાડ હોટલના ત્રીજા માળે આવેલા સ્વિમિંગ પૂલમાં બની હતી. બંને વિદેશી નાગરિકો શુક્રવારે સાંજે સ્વિમિંગ કરવા ગયા હતા. આ દરમિયાન તેમને વીજ કરંટ લાગ્યો હતો.
લુફ્થાન્સા અને IBM સાથે જોડાયેલા કર્મચારીઓનાં મોત
મૃતકોની ઓળખ 57 વર્ષીય એલેક્ઝાન્ડર મેક્સિમિલિયન થેઇસ અને 45 વર્ષીય જુરાજ હોર્વાટ તરીકે થઈ છે. એલેક્ઝાન્ડર જર્મનીના નાગરિક હતા અને લુફ્થાન્સા એરલાઇન્સમાં ક્રૂ મેમ્બર તરીકે કામ કરતા હતા. જ્યારે જુરાજ હોર્વાટ સ્લોવાકિયાના નાગરિક હતા અને ટેકનોલોજી કંપની IBMમાં પ્રોજેક્ટ મેનેજર તરીકે કાર્યરત હતા. બંને હોટલમાં રોકાયા હતા.
બચાવવા જતાં અમેરિકન નાગરિક સહિત બે ઘાયલ
સ્વિમિંગ પૂલમાં બંનેને મુશ્કેલીમાં જોઈને તેમને બચાવવાનો પ્રયાસ કરવામાં આવ્યો હતો. આ દરમિયાન હોટલમાં મહેમાન તરીકે રોકાયેલા 41 વર્ષીય અમેરિકન નાગરિક મેથ્યુ ડેસાન્ટિસ અને 28 વર્ષીય ભારતીય પૂલ એટેન્ડન્ટ રાહુલ તિવારીને પણ વીજ કરંટ લાગ્યો હતો. બંને ઘાયલોને તાત્કાલિક મણિપાલ હોસ્પિટલમાં ખસેડવામાં આવ્યા હતા. હાલ બંનેની સારવાર ચાલી રહી છે અને તેમની સ્થિતિ જોખમ બહાર હોવાનું જાણવા મળ્યું છે.
હોટલનો સ્વિમિંગ પૂલ એક મહિના માટે બંધ
ઘટના અંગે પોલીસમાં કેસ નોંધવામાં આવ્યો છે અને તપાસ શરૂ કરવામાં આવી છે. જોકે, હોટલ મેનેજમેન્ટ તરફથી હજુ સુધી આ ઘટના અંગે કોઈ સત્તાવાર પ્રતિક્રિયા આપવામાં આવી નથી. હોટલની વેબસાઇટ પર શનિવારે સવારે આપવામાં આવેલી જાણકારી મુજબ, સ્વિમિંગ પૂલને 31 ઓક્ટોબરથી 30 નવેમ્બર સુધી મેન્ટેનન્સના કામ માટે બંધ રાખવામાં આવ્યો છે. કોનરાડ હોટલ હિલ્ટન ગ્રૂપનો હિસ્સો છે. આ લક્ઝરી હોટલમાં એક સ્ટાન્ડર્ડ રૂમનું એક રાત્રિનું ભાડું ઓછામાં ઓછું 25,000 રૂપિયા હોવાનું જણાવાયું છે. ફાઇવ સ્ટાર હોટલના સ્વિમિંગ પૂલમાં બનેલી આ ઘટનાએ મહેમાનોની સુરક્ષા અને હોટલની વ્યવસ્થા સામે ગંભીર સવાલો ઊભા કર્યા છે.
