Video: દારૂના ગીત પર મંત્રી કુંવરજી બાવળિયાના ડાન્સનો વીડિયો વાયરલ, રાજકીય વર્તુળોમાં ચર્ચાનો વિષય

ગુજરાતમાં દારૂબંધીનો કાયદો અમલમાં હોવા વચ્ચે રાજ્યના મંત્રી કુંવરજી બાવળિયાના ડાન્સનો વીડિયો સોશિયલ મીડિયા પર વાયરલ થયો છે. રાજકોટ જિલ્લાના વિંછીયા તાલુકાના અમરાપુર ગામમાં યોજાયેલા નવરાત્રિ મહોત્સવ દરમિયાન મંત્રી લોકગાયક જીગ્નેશ કવિરાજના ગીત પર ઝૂમી ઊઠ્યા હતા. આ વીડિયો સામે આવ્યા બાદ રાજકીય અને સામાજિક વર્તુળોમાં ચર્ચા શરૂ થઈ છે.

વીડિયો વાયરલ થતાં ચર્ચાનો વિષય

અમરાપુર ખાતે યોજાયેલા નવરાત્રિ મહોત્સવમાં લોકગાયક જીગ્નેશ કવિરાજે ‘પાંચ વાગે અને પગ મારા ધ્રુજે’ ગીત રજૂ કર્યું હતું. આ ગીતના તાલે મંત્રી કુંવરજી બાવળિયાએ ડાન્સ કર્યો હતો. કાર્યક્રમ દરમિયાન મંત્રીના ડાન્સનો વીડિયો કોઈએ ઉતારીને સોશિયલ મીડિયા પર શેર કર્યો હતો, જે હવે ચર્ચાનો વિષય બન્યો છે.

ગુજરાતમાં દારૂબંધીનો કડક કાયદો અમલમાં છે. ત્યારે દારૂ સાથે જોડાયેલા અર્થ ધરાવતા ગીત પર મંત્રીના ડાન્સને લઈને સવાલો ઊઠી રહ્યા છે. જોકે, ગીતના તાલે ડાન્સ કરવાને દારૂના સેવન સાથે સીધો સંબંધિત ગણી શકાય નહીં. તેમ છતાં રાજ્યમાં દારૂબંધીના કાયદા અને જાહેર જીવનમાં જવાબદારીના મુદ્દે આ વીડિયો ચર્ચામાં આવ્યો છે.હાલ સોશિયલ મીડિયા પર આ વીડિયો અંગે વિવિધ પ્રતિક્રિયાઓ સામે આવી રહી છે.