VIDEO : મોરબીના જેતપર ખેડૂત આંદોલનને મળ્યો જિલ્લાના સરપંચોનો મોટો ટેકો

મોરબીના જેતપરમાં પોતાની પડતર માંગણીઓને લઈને ખેડૂતો દ્વારા ચલાવવામાં આવી રહેલા ઉગ્ર આંદોલનનો આજે સતત 12મો દિવસ છે, ત્યારે આ લડતને વધુ મજબૂત બનાવતો એક મોટો વળાંક આવ્યો છે. ખેડૂતોની ન્યાયિક માંગણીઓના સમર્થનમાં હવે મોરબી જિલ્લાના વિવિધ ગામોના સરપંચોની એકતા સામે આવી છે. જિલ્લાના 60 થી વધુ સરપંચો આજે વહેલી સવારે જેતપર ખાતે આવેલી ઉપવાસ છાવણી પર રૂબરૂ પહોંચ્યા હતા અને ખેડૂતોની સાથે પ્રતીક ઉપવાસ પર બેસીને પોતાનું સંપૂર્ણ સમર્થન જાહેર કર્યું હતું. સરપંચોના આ ખુલ્લા ટેકાને કારણે ખેડૂત આંદોલનને હવે ભારે બળ મળ્યું છે અને વહીવટી તંત્ર પર પણ દબાણ વધ્યું છે. આ લડત આગામી દિવસોમાં વધુ ઉગ્ર બને તેવા પૂરેપૂરા એંધાણ વર્તાઈ રહ્યા છે.