VIDEO: વડોદરામાં કોંગ્રેસનું હલ્લાબોલ! "ભાજપે લોકશાહીનું ખૂન કર્યું"ના નારા સાથે ગાંધીનગર ગૃહ ખાતે ધરણાં
છેલ્લું અપડેટ : 17 Apr 2026
VIDEO: વડોદરા શહેર કોંગ્રેસ સમિતિ દ્વારા આજે શહેરના મધ્યમાં આવેલા ઐતિહાસિક ગાંધીનગર ગૃહ ખાતે ભાજપ સરકારની નીતિઓ સામે ઉગ્ર વિરોધ પ્રદર્શન કરવામાં આવ્યું હતું. સ્થાનિક સ્વરાજ્યની ચૂંટણીઓમાં ભાજપ દ્વારા સામ, દામ, દંડ અને ભેદની નીતિ અપનાવીને વિરોધ પક્ષના ઉમેદવારોના ફોર્મ પાછા ખેંચાવવામાં આવ્યા હોવાના આક્ષેપ સાથે કોંગ્રેસે ધરણાં યોજ્યા હતા.
લોકશાહીનું ખૂન થયાનો આક્ષેપ
આ વિરોધ પ્રદર્શનમાં ખાસ ઉપસ્થિત રહેલા AICCના સેક્રેટરી અને મધ્ય ગુજરાતના પ્રભારી રામ કિસન એ ભાજપ પર આકરા પ્રહારો કર્યા હતા. તેમણે જણાવ્યું હતું કે, ભાજપે લોકશાહી પદ્ધતિથી ચૂંટણી યોજવાના બદલે ધાકધમકીથી ઉમેદવારોના ફોર્મ પાછા ખેંચાવીને 'લોકશાહીનું ખૂન' કર્યું છે. જો ભાજપ પાસે ખરેખર મજબૂત જનાધાર હોય, તો તેમણે જનતાના દરબારમાં જવું જોઈએ, પરંતુ સત્તાના જોરે બિનહરીફ થવા માટે દબાણ કરવું તે તેમની નબળાઈ દર્શાવે છે.
તંત્ર અને પોલીસનો દુરુપયોગ
વડોદરા શહેર કોંગ્રેસ પ્રમુખ ઋત્વિજ જોશીએ મીડિયા સાથેની વાતચીતમાં જણાવ્યું કે, "ભાજપ સરકાર પોલીસ અને વહીવટી પ્રશાસનનો ખુલ્લેઆમ દુરુપયોગ કરી રહી છે. વિરોધ પક્ષના ઉમેદવારોને ડરાવી-ધમકાવીને ફોર્મ પરત ખેંચવા મજબૂર કરવામાં આવ્યા છે. જનતા બધું જોઈ રહી છે અને આ પદ્ધતિના વિરોધમાં અમે આજે રસ્તા પર ઉતર્યા છીએ."
રાજકીય ગરમાવો
ચૂંટણી પૂર્વે જ વડોદરામાં જે રીતે વિરોધ પક્ષના ફોર્મ પાછા ખેંચાયા છે, તેને લઈને રાજકીય વાતાવરણ ગરમાયું છે. કોંગ્રેસના કાર્યકરોએ પ્લેકાર્ડ્સ અને સૂત્રોચ્ચાર દ્વારા ભાજપની 'બિનહરીફ' બનાવવાની હોડની ટીકા કરી હતી. આ ધરણાં કાર્યક્રમમાં શહેરના અનેક અગ્રણી નેતાઓ અને મોટી સંખ્યામાં કાર્યકર્તાઓ જોડાયા હતા.
