વડોદરામાં તાંત્રિક વિધિનો ઢોંગ કરી લોકો સાથે છેતરપિંડી કરતી ટોળકી ઝડપાઈ

વડોદરામાં તાંત્રિક વિધિનો ઢોંગ કરી લોકો સાથે છેતરપિંડી કરતી ટોળકીની ક્રાઇમ બ્રાન્ચે ધરપકડ કરી છે. વડોદરામાં આ ટોળકી એકનાં ડબલની લાલચે આપી લોકો સાથે ઠગાઇ કરી કુલ 6 ગુનાઓને અંજામ આપનાર 6ને હાલ ઝડપી પાડવામાં આવ્યા છે.

તાંત્રિક વિધિનો ઢોંગ કરી ખાસ કરીને મહિલાઓ સાથે છેતરપિંડી કરતી આ ગેંગના આરોપીઓ નવલખી મેદાનમાં પોતાની કમાણીનો ભાગ પાડીને વહેંચી રહ્યા હતા ને એવામાં જ પોલીસ ત્રાટકી તપાસ કરતાં આખો મામલો સામે આવ્યો.

આ ઢોંગી ટોળકીમાં કામ કરતાં આરોપીઓમાંથી ક્રાઇમ બ્રાન્ચે 6ને ઝડપ્યા છે જ્યારે ચાર શખ્સ હજુ પણ ફરાર છે. મોર છાપવાળી નોટ પર તાંત્રિક વિધિનો ડોળ કરતાં હતા અને 2 લાખનાં દસ લાખ થશે તેવું કહીને ડબ્બામાં પૈસા મુકાવતા હતા. અને ખોટી તાંત્રિક વિધિ કરીને કહેતા કે આ ડબ્બાને 2 મહિના પછી ખોલશો તો તમારા પૈસા ડબલ થઈ જશે.જ્યારે ભોગ બનનાર ડબ્બો ખોલતા તો 10 લાખના બદલે નારિયેળ નિકળતા. વડોદરા ઉપરાંત બોડેલીમાં પણ ટોળકીએ ઠગાઇ કરી હતી. 6 લાખ 75 હજાર રુપિયા રોકડા સહિત કુલ 8.59 લાખ રુપિયાનો મુદ્દામાલ પોલીસે કબ્જે કર્યો છે તેમજ અન્ય ફરાર થઈ ગયેલા ચાર આરોપીને શોધવા ચક્રો ગતિમાન કર્યા છે.