Video: સુરેન્દ્રનગર સબજેલ નજીક રેન્જ IG નિર્લિપ્ત રાયનું સરપ્રાઈઝ ચેકિંગ, કેદીઓનાં બહારથી આવતા ટિફિન બંધ

સુરેન્દ્રનગર સબજેલમાં નશીલા પદાર્થોના સપ્લાયની બાતમી મળતાં રેન્જ IG નિર્લિપ્ત રાય એક્શન મોડમાં આવ્યા છે. તેમણે સબજેલમાં સરપ્રાઈઝ ચેકિંગ હાથ ધર્યું હતું. આ દરમિયાન જેલની સુરક્ષા વ્યવસ્થા અને બહારથી થતી આવનજાવનને લઈને તપાસ કરવામાં આવી હતી. તપાસ બાદ જેલમાં તમામ કેદીઓ માટે બહારથી આવતા ટિફિન તાત્કાલિક અસરથી બંધ કરવામાં આવ્યાં છે.

જેલની આસપાસ આવેલી દુકાનોમાં ચેકિંગ

મળતી માહિતી મુજબ, જેલની અંદર નશીલા પદાર્થો પહોંચાડવામાં આવતા હોવાની બાતમી રેન્જ IG નિર્લિપ્ત રાયને મળી હતી. આ બાતમીના આધારે તેમણે જેલની મુલાકાત લઈને તપાસ હાથ ધરી હતી. ત્યારબાદ તેઓ પોતાની ટીમ સાથે જેલની આસપાસ આવેલી દુકાનોમાં પણ ચેકિંગ કરવા માટે પહોંચ્યા હતા. જેલની નજીક આવેલી દુકાનોમાં નશીલા પદાર્થોના વેચાણને રોકવા માટે પણ કાર્યવાહી કરવામાં આવી હતી. આ મામલે જિલ્લા પોલીસને પણ જરૂરી ગુનો દાખલ કરવા સૂચના આપવામાં આવી હોવાનું જાણવા મળ્યું છે.

જેલની અંદર આરોપીઓની પૂછપરછ દરમિયાન કેટલીક ચોંકાવનારી વિગતો સામે આવી હોવાની આશંકા પણ વ્યક્ત કરવામાં આવી રહી છે. જોકે, નશીલા પદાર્થો જેલમાં કેવી રીતે પહોંચતા હતા અને તેમાં કોની સંડોવણી છે તે અંગેની સત્તાવાર વિગતો સામે આવવાની બાકી છે. સમગ્ર મામલે પોલીસની તપાસ બાદ વધુ ખુલાસા થવાની શક્યતા છે.