Surendranagarમાં હવે ડેમ પણ અસુરક્ષિત,પીવાના પાણી માટે આરક્ષિત ડેમમાંથી રેતી ચોરીનો પર્દાફાશ
છેલ્લું અપડેટ : 15 Nov 2025
સૌરાષ્ટ્રના લાખો લોકોને સૌની યોજના મારફતે પીવાનું પાણી પૂરું પાડતા સુરેન્દ્રનગરના ધોળીધજા ડેમમાં જ ખનિજ માફિયાઓ દ્વારા આચરવામાં આવતી ગેરકાયદેસર રેતી ચોરીના એક વિશાળ નેટવર્કનો પર્દાફાશ થયો છે. ખમીસાણા નજીક ડેમમાં હોડકાં અને પાઇપલાઇન ગોઠવીને રેતી ચોરતા માફિયાઓનો આ ધડાકો સપાટી પર આવતાં સમગ્ર જિલ્લામાં ખળભળાટ મચી ગયો છે.
પીવાના પાણી માટે આરક્ષિત આ ડેમમાંથી ખનિજ ચોરી થવાથી ડેમની જળસંગ્રહ ક્ષમતા અને તેની માળખાકીય સુરક્ષા સામે ગંભીર સવાલો ઊભા થયા છે. 3 ટ્રક હોડકાઓ સહિત કુલ 1.50 કરોડનો મુદ્દામાલ જપ્ત કરવામાં આવ્યો છે. વિભાગે આ મામલે કાયદેસરની કાર્યવાહી શરૂ કરી છે.
સૌરાષ્ટ્રને પીવાનું પાણી પૂરું પાડતા અતિ મહત્ત્વના ધોળીધજા ડેમમાં જ આટલા મોટા પાયે ખનિજ ચોરી થવી એ તંત્રની કામગીરી અને સુરક્ષા વ્યવસ્થા પર ગંભીર સવાલ ઊભા કરે છે. ભૂતકાળમાં પણ આ વિસ્તારમાં રેતી ચોરીની ફરિયાદો અને દુર્ઘટનાઓ સામે આવી છે, છતાં ખનિજ માફિયાઓ બેફામ બનીને સરકારની તિજોરીને અને જાહેર સંપત્તિને નુકસાન પહોંચાડી રહ્યા છે.
