Narmada news: PM નરેન્દ્ર મોદી શનિવારે સુરત અને નર્મદામાં વિવિધ વિકાસ કાર્યોનો પ્રારંભ કરાવશે
છેલ્લું અપડેટ : 14 Nov 2025
Narmada news: આવતીકાલે વડાપ્રધાન નરેન્દ્ર મોદી એકવાર ફરી વતનની મુલાકાતે આવવાના છે. પ્રથમ સુરત જિલ્લામાં અને ત્યારબાદ નર્મદા જિલ્લાના ડેડિયાપાડામાં ભગવાન બિરસા મુંડાની જન્મજયંતી પ્રસંગે હાજર રહેવાના છે. પીએમ મોદી સુરત જિલ્લાના પલસાણા તાલુકાના અંતરોલી ખાતે મુલાકાત લેશે. અંતરોલી ગામે આધુનિક બુલેટ ટ્રેન સ્ટેશનની મુલાકાતનો કાર્યક્રમ ગોઠવાયો છે. આ બુલેટ ટ્રેન સ્ટેશનનું કામગીરી અંતિમ તબક્કામાં છે. જે કામગીરીનું પ્રધાનમંત્રી નિરીક્ષણ કરશે.
મળતી માહિતી અનુસાર, પીએમ મોદી નરેન્દ્ર મોદી બિહાર ચૂંટણીના પરિણામો આવ્યાના બીજા દિવસે એટલે કે, શનિવારે ગુજરાતની મુલાકાતે આવવાના છે. ગુજરાતમાં પીએમ મોદી બે જિલ્લા સુરત અને ત્યારબાદ નર્મદાના ડેડિયાપાડા જશે. સુરતમાં બુલેટ ટ્રેન પ્રોજેક્ટની મુલાકાત લઈને ત્યાંથી તેઓ નર્મદા જિલ્લાના ડેડિયાપાડા જશે.
શનિવારે 15 નવેમ્બરે આદિવાસી ગૌરવ દિવસ નિમિત્તે પીએમ મોદી ભગવાન બિરસા મુંડાની 150મી જન્મજયંતીની ઉજવણીમાં ભાગ લેશે. પીએમ મોદી નર્મદાના ડેડિયાપાડા ખાતે રૂપિયા 9,700 કરોડથી વધુના વિકાસ પ્રોજેક્ટ્સનું ઉદ્ઘાટન અને શિલાન્યાસ કરશે. આ પ્રોજેક્ટ્સ માળખાગત સુવિધાઓ, આરોગ્ય, શિક્ષણ અને વારસા પર ધ્યાન કેન્દ્રિત કરે છે, જેમાં આદિવાસી સશક્તિકરણ પર ખાસ ભાર મૂકવામાં આવ્યો છે
પીએમ નરેન્દ્ર મોદી 15 નવેમ્બરના રોજ બપોરે લગભગ 12:45 વાગ્યે તેઓ નર્મદા જિલ્લામાં દેવમોગરા મંદિરમાં પ્રાર્થના કરશે અને દર્શન કરશે. ત્યારબાદ, બપોરે લગભગ 2:45 વાગ્યે, પ્રધાનમંત્રી નર્મદા જિલ્લામાં ડેડિયાપાડાની મુલાકાત લેશે અને ધરતી આબા ભગવાન બિરસા મુંડાની 150મી જન્મજયંતી ઉજવણીમાં ભાગ લેશે. આ પ્રસંગે, તેઓ રૂપિયા 9,700 કરોડથી વધુની વિવિધ માળખાગત સુવિધાઓ અને વિકાસ પ્રોજેક્ટ્સનું ઉદ્ઘાટન અને શિલાન્યાસ કરશે અને સભાને સંબોધન પણ કરશે.
ડેડિયાપાડામાં આયોજિત કાર્યક્રમ દરમિયાન, પ્રધાનમંત્રી આદિવાસી સમુદાયોના ઉત્થાન અને પ્રદેશના ગ્રામીણ અને દૂરના વિસ્તારોમાં માળખાગત સુવિધાઓ સુધારવાના હેતુથી અનેક વિકાસ પ્રોજેક્ટ્સનું ઉદ્ઘાટન અને શિલાન્યાસ કરશે.
પીએમ જનજાતિ આદિવાસી ન્યાય મહા અભિયાન (પીએમ-જનમાન) અને ધરતી આબા જનજાતિ ગ્રામ ઉત્કર્ષ અભિયાન (ડીએ-જાગુઆ) હેઠળ બાંધવામાં આવેલા 100,000 મકાનોના ગૃહ પ્રવેશ સમારોહમાં ભાગ લેશે.
પ્રધાનમંત્રી આશરે રૂપિયા 1,900 કરોડના ખર્ચે આદિવાસી વિદ્યાર્થીઓને સમર્પિત 42 એકલવ્ય મોડેલ રહેણાક શાળાઓ (EMRS), સમુદાય-આધારિત પ્રવૃત્તિઓ માટે કેન્દ્ર તરીકે સેવા આપતા 228 બહુહેતુક કેન્દ્રો, દિબ્રુગઢની આસામ મેડિકલ કૉલેજ ખાતે સ્પર્ધાત્મકતા કેન્દ્ર અને આદિવાસી સંસ્કૃતિ અને વારસાના સંરક્ષણ માટે મણિપુરના ઈમ્ફાલમાં આદિવાસી સંશોધન સંસ્થા (TRI) ભવનનું ઉદ્ઘાટન કરશે. વધુમાં, પ્રધાનમંત્રી આદિવાસી વિસ્તારોમાં કનેક્ટિવિટી સુધારવા માટે ગુજરાતના 14 આદિવાસી જિલ્લાઓ માટે 250 બસોને લીલી ઝંડી આપશે.
પ્રધાનમંત્રી આદિવાસી વિસ્તારોમાં કનેક્ટિવિટી વધારવા માટે 748 કિલોમીટરના નવા રસ્તાઓ અને DA-JAGUA હેઠળ સમુદાય કેન્દ્રો તરીકે સેવા આપવા માટે 14 આદિવાસી મલ્ટી-માર્કેટિંગ સેન્ટર્સ (TMMC)નો શિલાન્યાસ કરશે. તેઓ રૂપિયા 2,320 કરોડથી વધુના ખર્ચે 50 નવી એકલવ્ય મોડેલ રહેણાંક શાળાઓનો શિલાન્યાસ પણ કરશે, જે આદિવાસી બાળકોને ગુણવત્તાયુક્ત શિક્ષણ પૂરું પાડવાની સરકારની પ્રતિબદ્ધતાને વધુ મજબૂત બનાવશે.
