VIDEO: સરકારી શાળામાં એડમિશન માટે વહેલી સવારથી લાંબી લાઈનો: સુરતના વાલીઓએ બદલ્યો ટ્રેન્ડ
છેલ્લું અપડેટ : 13 Apr 2026
VIDEO: ડાયમંડ સિટી તરીકે ઓળખાતું સુરત હવે શિક્ષણ ક્ષેત્રે પણ એક નવો ઈતિહાસ લખી રહ્યું છે. સુરતના મોટા વરાછા વિસ્તારમાં આવેલી નગર પ્રાથમિક શિક્ષણ સમિતિ સંચાલિત શાળાઓમાં એડમિશન મેળવવા માટે વાલીઓની જે રીતે લાંબી લાઈનો લાગી છે, તે જોઈને સૌ કોઈ આશ્ચર્યચકિત છે.
વહેલી સવારથી વાલીઓની ભીડ
મોટા વરાછામાં આવેલી શાળા ક્રમાંક 334, 346 અને 355, જે મહારાજા કૃષ્ણકુમારસિંહજી પ્રાથમિક શાળા તરીકે ઓળખાય છે, ત્યાં વહેલી સવારના 4 વાગ્યાથી વાલીઓ લાઈનમાં ઉભા રહી ગયા હતા. આ દ્રશ્યો કોઈ ખાનગી હાઈ-ફાઈ સ્કૂલના નથી, પરંતુ સરકારી શાળાના છે. વાલીઓનો મુખ્ય ઉદ્દેશ્ય પોતાના બાળકોને ઉત્તમ અને ગુણવત્તાયુક્ત શિક્ષણ આપવાનો છે, જે હવે આ સરકારી શાળાઓમાં મળી રહ્યું છે.
ખાનગી શાળાઓ પ્રત્યે મોહભંગ?
આ ઘટનાનું સૌથી મહત્ત્વનું પાસું એ છે કે, લાઈનમાં ઉભેલા મોટાભાગના વાલીઓ પોતાના બાળકોને ખાનગી શાળામાંથી ઉઠાડીને અહીં લાવ્યા છે. ખાનગી શાળાઓની મોંઘી ફી અને તેની સામે સરકારી શાળાઓમાં ઉપલબ્ધ આધુનિક ટેક્નોલૉજી, ડિજિટલ ક્લાસરૂમ અને અનુભવી શિક્ષકોને કારણે વાલીઓનો વિશ્વાસ સરકારી શિક્ષણ પર વધ્યો છે.
માંગ અને પૂરવઠા વચ્ચે મોટું અંતર
શાળા પ્રશાસન પાસેથી મળતી માહિતી મુજબ, શાળાની ક્ષમતા માત્ર 400 વિદ્યાર્થીઓની છે, પરંતુ તેની સામે અત્યાર સુધીમાં 2000 થી વધુ ફોર્મનું રજીસ્ટ્રેશન થઈ ચૂક્યું છે. આટલી મોટી સંખ્યામાં અરજીઓ આવતા હવે શાળા દ્વારા પારદર્શક રીતે 'ડ્રો' સિસ્ટમથી એડમિશન આપવાની પ્રક્રિયા હાથ ધરવામાં આવશે.
