VIDEO: વસ્ત્રાલમાં 'નો એન્ટ્રી': રોડ-રસ્તાના ઠેકાણા નથી તો મત પણ નથી, વેદાંત સ્કાય લાઇન સોસાયટીમાં રાજકીય પક્ષોના પ્રવેશ પર પ્રતિબંધ!
છેલ્લું અપડેટ : 12 Apr 2026
VIDEO: અમદાવાદ શહેરના પૂર્વ વિસ્તારમાં આવેલા વસ્ત્રાલ વોર્ડમાં વિકાસના દાવાઓની પોલ ખુલી ગઈ છે. ન્યૂ વસ્ત્રાલ વિસ્તારમાં આવેલી વેદાંત સ્કાય લાઇન સોસાયટીના રહીશોએ પ્રાથમિક સુવિધાઓના અભાવે રોષે ભરાઈને તમામ રાજકીય પક્ષોનો બહિષ્કાર જાહેર કર્યો છે. સોસાયટીના મુખ્ય દરવાજા પર મોટા બેનરો લગાવી દેવામાં આવ્યા છે, જેમાં સ્પષ્ટ લખ્યું છે કે, "કોઈપણ રાજકીય પક્ષના નેતાઓએ સોસાયટીમાં પ્રવેશ કરવો નહીં."
શા માટે લોકોમાં રોષ છે?
સ્થાનિક રહીશોના જણાવ્યા અનુસાર, છેલ્લા લાંબા સમયથી આ વિસ્તારમાં રોડ-રસ્તાની હાલત અત્યંત બિસ્માર છે. ધૂળની ડમરીઓ અને ખાડાઓને કારણે લોકોનું જીવવું દુષ્કર બન્યું છે. ગટર અને પાણી જેવી પ્રાથમિક સુવિધાઓ માટે પણ વારંવાર રજૂઆતો કરવા છતાં તંત્ર કે રાજકીય નેતાઓ દ્વારા કોઈ નક્કર કામગીરી કરવામાં આવી નથી. જ્યારે ચૂંટણી નજીક આવે છે ત્યારે જ નેતાઓ દેખાય છે, તેવી લાગણી સાથે લોકોએ આ આક્રમક રસ્તો અપનાવ્યો છે.
રાજકીય પક્ષોમાં ફફડાટ
સ્થાનિક સ્વરાજ્યની ચૂંટણીઓ પહેલા જ જનતાનો આ પ્રકારે વિરોધ જોતા ભાજપ, કોંગ્રેસ અને આપ (AAP) જેવા પક્ષોમાં ફફડાટ જોવા મળી રહ્યો છે. વસ્ત્રાલ એ પૂર્વ અમદાવાદનો મહત્વનો વિસ્તાર છે, અને જો અહીં જનતા ચૂંટણી બહિષ્કાર કરે તો તેની અસર પરિણામો પર પડી શકે છે. રહીશોનું કહેવું છે કે જ્યાં સુધી અમારા વિસ્તારમાં રોડ-રસ્તાની સુવિધા શરૂ નહીં થાય, ત્યાં સુધી કોઈ પણ પક્ષના નેતાને અહીં પગ મૂકવા દેવામાં આવશે નહીં.
