VIDEO: સુરતમાં ખાડીપૂરથી સ્થિતિ ખરાબ
છેલ્લું અપડેટ : 08 Jul 2026
સુરત શહેરમાં ભારે વરસાદને કારણે ખાડી પૂરે વિકરાળ સ્વરૂપ ધારણ કરતાં જનજીવન અસ્તવ્યસ્ત થઈ ગયું છે. ઉપરવાસમાં પડેલા ભારે વરસાદના લીધે સીમાડા ખાડી ઓવરફ્લો થતાં તેના પાણી રહેણાંક વિસ્તારોમાં ઘૂસી ગયા છે. ખાડીના પૂરના પાણી સુરતના સરથાણા, સરથાણા જકાત નાકા, પર્વત પાટિયા, ચીકુવાડી અને સાણીયા જેવા અનેક નીચાણવાળા વિસ્તારોમાં ફરી વળ્યા છે. રસ્તાઓ અને સોસાયટીઓમાં ઘૂંટણસમા પાણી ભરાઈ જવાના કારણે હજારો સ્થાનિક લોકો પોતાના જ ઘરોમાં કેદ થઈને પાણીમાં રહેવા મજબૂર બન્યા છે. વાહનવ્યવહાર ઠપ્પ થઈ જતાં લોકોને રોજિંદી જરૂરી ચીજવસ્તુઓ મેળવવામાં પણ ભારે હાલાકીનો સામનો કરવો પડી રહ્યો છે. પૂરની આ ગંભીર પરિસ્થિતિને કારણે સ્થાનિક તંત્ર એલર્ટ મોડ પર આવ્યું છે અને પ્રભાવિત વિસ્તારોમાં રાહત કામગીરી શરૂ કરવામાં આવી છે. લોકો આ આફતમાંથી વહેલી તકે બહાર નીકળે અને ખાડીના પાણી ઓસરે તેવી આશા સાથે વહીવટી તંત્રની મદદની રાહ જોઈ રહ્યા છે.
