Suratની મહિલા BLOના શંકાસ્પદ મોત મામલે રિપોર્ટમાં ચોંકાવનારો ખુલાસો, આ રીતે થયું હતું મૃત્યુ
છેલ્લું અપડેટ : 26 Nov 2025
સુરત મહાનગરપાલિકામાં BLO (બૂથ લેવલ ઓફિસર) તરીકે ફરજ બજાવતા એક મહિલા કર્મચારીના શંકાસ્પદ મૃત્યુના મામલે પ્રાથમિક રિપોર્ટમાં ચોંકાવનારો ખુલાસો થયો છે. મૃતક મહિલા BLO, જેનું નામ ડિંકલ છે, તેઓ બે દિવસ પહેલા તેમના ઘરે બાથરૂમમાંથી બેભાન અવસ્થામાં મળી આવ્યા હતા. શરૂઆતમાં આ મૃત્યુ શંકાસ્પદ જણાતું હતું, પરંતુ હવે પેનલ ફોરેન્સિક પોસ્ટમોર્ટમ થયા બાદના પ્રાથમિક રિપોર્ટમાં જાણવા મળ્યું છે કે તેમનું મૃત્યુ ગેસ ગીઝરના કારણે થયેલા ગુંગળામણ (Asphyxiation) થી થયું હોવાની શક્યતા છે.
સુરત પોલીસે આ રિપોર્ટના આધારે વધુ તપાસ હાથ ધરી છે અને ગીઝરના ઉપયોગ અને બાથરૂમના વેન્ટિલેશનની સ્થિતિ અંગેની વિગતો મેળવવામાં આવી રહી છે.
ગેસ ગીઝર અને ગુંગળામણનો ખતરો
ગેસ ગીઝર, ખાસ કરીને જો તે બાથરૂમ જેવા બંધ અને ઓછા વેન્ટિલેશનવાળી જગ્યાએ ઇન્સ્ટોલ કરેલું હોય, તો તે ઓક્સિજનનો ઉપયોગ કરીને કાર્બન મોનોક્સાઇડ (Carbon Monoxide - CO) નામનો ઝેરી ગેસ ઉત્પન્ન કરે છે. આ CO ગેસ રંગહીન અને ગંધહીન હોવાથી વ્યક્તિને તેની હાજરીનો ખ્યાલ આવતો નથી અને તે ધીમે ધીમે શરીરને ઓક્સિજન મળતો બંધ કરી દે છે, જેના કારણે ગુંગળામણથી મૃત્યુ થઈ શકે છે.
