Rajkot news: નકલી નોટોના કારખાનાનો પર્દાફાશ: SOG એ મફતિયા પરામાં રેડ કરી કલર પ્રિન્ટર સાથે શખ્સને દબોચ્યો
છેલ્લું અપડેટ : 12 Mar 2026
Rajkot news: રંગીલું રાજકોટ નકલી નોટોના કાળા કારોબારથી ખળભળી ઉઠ્યું છે. રાજકોટ સ્પેશિયલ ઓપરેશન ગૃપ (SOG) ની ટીમે એક બાતમીના આધારે દરોડો પાડીને નકલી નોટો છાપતા એક રીઢા શખ્સને ઝડપી પાડ્યો છે. આ કામગીરીથી શહેરમાં નકલી નોટો વહેતી કરવાનું મોટું નેટવર્ક પકડાય તેવી શક્યતા સેવાઈ રહી છે.
રૈયાધાર વિસ્તારમાં SOGનો સપાટો
રાજકોટ SOGની ટીમને ચોક્કસ બાતમી મળી હતી કે રૈયાધાર ગૌશાળા પાસે આવેલા મફતિયા પરા વિસ્તારમાં નકલી નોટો છાપવાનું કામ ચાલી રહ્યું છે. આ બાતમીના આધારે પોલીસે તાત્કાલિક દરોડો પાડ્યો હતો. આ સર્ચ ઓપરેશન દરમિયાન પોલીસને નૈતિક અગ્રાવત નામનો શખ્સ શંકાસ્પદ હાલતમાં મળી આવ્યો હતો. પોલીસે તેની પાસેથી રૂપિયા 100 અને રૂપિયા 200ના દરની કુલ 38 નકલી નોટો જપ્ત કરી છે.
નકલી નોટો છાપવાની ટેક્નોલૉજી પણ ઝડપાઈ
આરોપી માત્ર નોટો રાખતો જ નહોતો, પરંતુ તે જાતે જ નોટો છાપતો હતો. પોલીસને ઘટનાસ્થળેથી નકલી નોટ બનાવવા માટે ઉપયોગમાં લેવાતું કલર પ્રિન્ટર અને ખાસ પ્રકારના કાગળ પણ મળી આવ્યા છે. આરોપી કલર પ્રિન્ટર જેવી સાદી ટેક્નોલૉજીનો ઉપયોગ કરીને અસલી જેવી દેખાતી નોટો છાપી ગરીબ અને અભણ લોકોને છેતરતો હોવાનું પ્રાથમિક તપાસમાં બહાર આવ્યું છે.
ઊંડાણપૂર્વકની તપાસ શરૂ
SOG દ્વારા હાલ આરોપીની ધરપકડ કરી લેવામાં આવી છે. પોલીસ હવે એ દિશામાં તપાસ કરી રહી છે કે: આરોપી કેટલા સમયથી આ કાળો કારોબાર કરી રહ્યો હતો?, અત્યાર સુધીમાં તેણે કેટલી નકલી નોટો બજારમાં મૂકી છે?
આ કૌભાંડમાં તેની સાથે અન્ય કોઈ શખ્સો સામેલ છે કે કેમ?. બજારમાં નકલી નોટો ઘૂસાડવી એ દેશના અર્થતંત્ર માટે ગંભીર ખતરો છે, તેથી આ કેસની તપાસ અત્યંત મહત્ત્વની બની ગઈ છે. સોશિયલ મીડિયા પર પોલીસની આ સફળ કામગીરીના વીડિયો અને તસવીરો વાયરલ થતા લોકોમાં જાગૃતિ જોવા મળી રહી છે.