VIDEO: પાટણ પોલીસ એક્શન મોડમાં! જાહેર સભામાં દારૂના વેચાણની કબૂલાત કરનાર બુટલેગરના ઘરે રેડ, દેશી દારૂના વોશનો નાશ કરાયો
છેલ્લું અપડેટ : 22 Apr 2026
VIDEO: પાટણ જિલ્લાના અડિયા ગામે યોજાયેલી કોંગ્રેસની એક જાહેર સભા અત્યારે સોશિયલ મીડિયા અને રાજકીય વર્તુળોમાં ચર્ચાનો વિષય બની છે. કોંગ્રેસના ધારાસભ્ય દિનેશ ઠાકોરની ઉપસ્થિતિમાં યોજાયેલી આ સભામાં કેટલાક સ્થાનિક બુટલેગરોએ જાહેર સ્ટેજ પર આવીને પોતે દારૂના વ્યવસાય સાથે સંકળાયેલા હોવાની કબૂલાત કરી હતી.
સ્ટેજ પરથી પોલીસની કામગીરી સામે સવાલ
સભા દરમિયાન બુટલેગરોએ માઈક હાથમાં લઈને જણાવ્યું હતું કે, "અમે બુટલેગર છીએ અને હતા, પરંતુ હવે અમે આ ધંધો બંધ કરવા માંગીએ છીએ." આ નિવેદન દ્વારા તેમણે ચૂંટણીમાં મત મેળવવાના પ્રયાસરૂપે દારૂબંધીની ખાતરી આપી હતી. જોકે, જાહેર સ્ટેજ પર ગુનેગારોની આવી હાજરીએ પાટણ જિલ્લા પોલીસની કામગીરી અને ગુપ્તચર તંત્ર પર અનેક સવાલો ઉભા કર્યા હતા.
નિવેદન બાદ પોલીસની તવાઈ
બુટલેગરોએ સ્ટેજ પરથી પોલીસને પડકાર ફેંક્યો હોય તેવી સ્થિતિ સર્જાતા પાટણ પોલીસ તાત્કાલિક એક્શનમાં આવી હતી. જે વ્યક્તિએ સ્ટેજ પરથી કબૂલાત કરી હતી, તેના રહેણાંક મકાન પર પોલીસે તાત્કાલિક દરોડો પાડ્યો હતો. આ સર્ચ ઓપરેશન દરમિયાન બુટલેગરના ઘરેથી દેશી દારૂ બનાવવાનો કાચો માલ મળી આવ્યો હતો. પોલીસે વિલંબ કર્યા વગર ઘટના સ્થળે જ દારૂના આ જથ્થાનો નાશ કર્યો હતો.
રાજકીય ગરમાવો
ચૂંટણીના માહોલમાં કોંગ્રેસના ધારાસભ્યની હાજરીમાં ગુનેગારોનું સ્ટેજ પર આવવું અને ત્યારબાદ પોલીસની કાર્યવાહી થવી, આ ઘટનાએ પાટણ જિલ્લામાં રાજકીય ગરમાવો લાવી દીધો છે. એક તરફ જનતામાં દારૂબંધીના વચનો અપાઈ રહ્યા છે, ત્યારે બીજી તરફ પ્રત્યક્ષ પુરાવા મળતા પોલીસની કડક કાર્યવાહી જોવા મળી છે.
