VIDEO: પાલીતાણાના શેત્રુંજી ડેમમાં નવા નીરની ધૂમ આવક! ડેમની સપાટી ૨૪ ફૂટને પાર, ખેડૂતોમાં આનંદ

ભાવનગરના પાલીતાણામાં આવેલા શેત્રુંજી ડેમમાં ઉપરવાસમાં પડેલા વરસાદને પગલે નવા નીરની આવક શરૂ થઈ છે. ડેમમાં હાલ 29 હજાર 615 ક્યુસેક પાણીની જબરદસ્ત આવક થઈ રહી છે, જેના કારણે ડેમની સપાટી વધીને 24 ફૂટ પાંચ ઈંચ સુધી પહોંચી ગઈ છે. જળસ્તરમાં થયેલા આ નોંધપાત્ર વધારાને કારણે સ્થાનિક ખેડૂતોમાં ભારે ઉત્સાહ જોવા મળી રહ્યો છે. સિંચાઈ માટે પૂરતું પાણી મળવાની આશાએ ખેડૂતોએ રાહતનો શ્વાસ લીધો છે. વહીવટી તંત્ર દ્વારા પણ ડેમની સ્થિતિ પર સતત મોનિટરિંગ રાખવામાં આવી રહ્યું છે અને ડેમમાં પાણીની આવક વધતા આસપાસના વિસ્તારોમાં પણ ખુશીનો માહોલ છવાયો છે.