VIDEO: Morbiમાં મેગા ડિમોલિશન; ગંભીર ગુનામાં સંડોવાયેલા આરોપીઓના ગેરકાયદેસર મકાનો પર ફરી વળ્યું બુલડોઝર
છેલ્લું અપડેટ : 12 Mar 2026
મોરબી પોલીસ હવે ગુનેગારો સામે લાલ આંખ કરી રહી છે. શહેરમાં દારૂ, વ્યાજખોરી અને અન્ય અનેક ગંભીર ગુનાઓમાં સંડોવાયેલા કુખ્યાત શખ્સો સામે પોલીસે મોટી કાર્યવાહી હાથ ધરી છે. સિટી એ ડિવિઝન પોલીસ સ્ટેશન વિસ્તારમાં આરોપી બી.કે. બોરીચા અને જીગરના ગેરકાયદેસર મકાનો પર પોલીસનું બુલડોઝર ફરી વળ્યું છે.
પોલીસ અને વહીવટી તંત્ર દ્વારા સંયુક્ત રીતે હાથ ધરવામાં આવેલી આ કામગીરીમાં અંદાજે 642 ચોરસ મીટર જમીન પર થયેલું ગેરકાયદે બાંધકામ તોડી પાડવામાં આવ્યું છે. આ જમીનની અંદાજિત કિંમત 65 લાખ રૂપિયા હોવાનું જાણવા મળી રહ્યું છે. ગુનેગારો દ્વારા સરકારી જમીન કે ગેરકાયદે રીતે ઉભા કરાયેલા આ મકાનોને 3 જેટલા જેસીબી મશીનોની મદદથી તોડી પાડી જમીનદોસ્ત કરી દેવાયા છે.
આ ડિમોલિશન કામગીરી દરમિયાન કોઈ અપ્રિય ઘટના ન બને તે માટે પોલીસ દ્વારા લોખંડી બંદોબસ્ત ગોઠવવામાં આવ્યો હતો. મોરબી DYSP જે.એમ. આલ, મામલતદાર, પીઆઈ, પીએસઆઈ સહિતના ઉચ્ચ અધિકારીઓ ઘટનાસ્થળે હાજર રહ્યા હતા. આ સાથે જ 25 જેટલા પોલીસ કર્મીઓનો ચુસ્ત કાફલો તૈનાત કરવામાં આવ્યો હતો.
