VIDEO: ભાજપ નેતાએ જાહેરમાં કબૂલ્યું; 'છાતી ઠોકીને કહું છું કે મેં રૂપિયા બનાવ્યા છે'
છેલ્લું અપડેટ : 05 Apr 2026
VIDEO: સ્થાનિક સ્વરાજની ચૂંટણીનો જંગ જામ્યો છે અને પ્રચારનો ધમધમાટ તેજ છે, ત્યારે ખેડા જિલ્લા ભાજપના દિગ્ગજ નેતા અને અમૂલના પૂર્વ ચેરમેન વિપુલ પટેલના એક નિવેદને રાજકીય આલમમાં ખળભળાટ મચાવી દીધો છે. નડિયાદમાં આયોજિત એક જાહેર કાર્યક્રમ દરમિયાન વિપુલ પટેલે સ્ટેજ પરથી ખુલ્લેઆમ સ્વીકાર કર્યો કે તેમણે રાજકારણમાં રહીને રૂપિયા બનાવ્યા છે.
પારદર્શક વહીવટ સામે સવાલો
સામાન્ય રીતે રાજકીય નેતાઓ જનસેવાના દાવા કરતા હોય છે, પરંતુ વિપુલ પટેલના આ પ્રકારના સરાજાહેર નિવેદનથી ભાજપના પારદર્શક વહીવટ અને નૈતિક મૂલ્યો સામે ગંભીર સવાલો ઉભા થયા છે. આ નિવેદનનો વીડિયો સોશિયલ મીડિયા પર વાયુવેગે વાયરલ થતા જ ભાજપ સંગઠન રક્ષણાત્મક સ્થિતિમાં આવી ગયું છે. વિપક્ષી દળો હવે આ મુદ્દાને ભ્રષ્ટાચાર સાથે જોડીને ચૂંટણી પ્રચારમાં જોરશોરથી ઉછાળી રહ્યા છે.
શિસ્તભંગના પગલાંની શક્યતા
વિપુલ પટેલ ખેડા જિલ્લાના રાજકારણમાં મોટું કદ ધરાવે છે, પરંતુ ચૂંટણીના ટાણે જ આવા નિવેદનથી પક્ષની છબી ખરડાઈ હોવાનું ચર્ચાઈ રહ્યું છે. હવે જોવાનું એ રહે છે કે ભાજપ હાઈકમાન્ડ પોતાના આ નેતા સામે શિસ્તભંગના પગલાં ભરે છે કે પછી મામલો થાળે પાડવાનો પ્રયાસ કરે છે. આ ઘટના આગામી ચૂંટણીના પરિણામો પર કેવી અસર પાડશે તે 'અદભુત' રીતે જોવું રસપ્રદ રહેશે.
