Video: ભરૂચમાં ભાવવધારા વચ્ચે દશેરા પર ફાફડા-જલેબી ખરીદવા લોકોની ઉમટી ભારે ભીડ

ભરૂચ શહેર અને જિલ્લાભરમાં નવરાત્રિ પર્વના ઉત્સાહભેર સમાપન બાદ વિજયાદશમી એટલે કે દશેરાના પાવન પર્વે લોકોએ પરંપરાગત રીતે ફાફડા અને જલેબીની મનભરીને લિજ્જત માણી હતી. શહેરના સેવાશ્રમ, શક્તિનાથ તેમજ તુલસીધામ સહિતના મુખ્ય વિસ્તારોમાં આવેલી ફરસાણની દુકાનો પર સવારથી જ લોકોની લાંબી કતારો જોવા મળી હતી. ચાલુ વર્ષે ભાવમાં ૨૦ ટકાનો વધારો થયો હોવા છતાં, મોંઘવારીને બાજુ પર મૂકીને ઉત્સવપ્રિય જનતા ખરીદી માટે ઉમટી પડી હતી. ધાર્મિક માન્યતા મુજબ ભગવાન શ્રીરામને જલેબી અત્યંત પ્રિય હતી અને નવરાત્રિના ઉપવાસ બાદ ચણાના લોટની વાનગીથી પારણાં કરવાનો મહિમા હોવાથી દશેરાના દિવસે ફાફડા-જલેબી ખાવાની પરંપરા આજે પણ ભરૂચમાં એટલી જ અકબંધ અને ઉત્સાહપૂર્વક જળવાઈ રહી છે.