ગુજરાતમાં 38 શંકાસ્પદ બોગસ ડોક્ટરો ઝડપાયા, 35 સામે FIR

ગુજરાતમાં માન્ય તબીબી લાયકાત વિના દર્દીઓની સારવાર કરતા શંકાસ્પદ બોગસ ડોક્ટરો સામે રાજ્યના આરોગ્ય વિભાગે કડક કાર્યવાહી હાથ ધરી છે. રાજ્યવ્યાપી તપાસ અભિયાન દરમિયાન કુલ 38 શંકાસ્પદ તબીબોની ઓળખ કરવામાં આવી છે, જેમાંથી 35 સામે પોલીસ દ્વારા FIR (First Information Report) નોંધવામાં આવી છે. આ કાર્યવાહી માટે આરોગ્ય વિભાગ અને પોલીસ દ્વારા કુલ 298 ટીમો બનાવવામાં આવી હતી. સ્થાનિક પોલીસ, ક્રાઇમ બ્રાન્ચ અને સ્પેશિયલ ઓપરેશન ગ્રુપ (SOG)ના અધિકારીઓએ વિવિધ જિલ્લાઓમાં ક્લિનિક અને અન્ય સ્થળોએ તપાસ કરી હતી. આ દરમિયાન સારવાર આપતા વ્યક્તિઓના તબીબી પ્રમાણપત્રો અને લાયકાતની ચકાસણી કરવામાં આવી હતી.

જિલ્લાવાર આંકડા મુજબ, રાજકોટમાં સૌથી વધુ 17 શંકાસ્પદ બોગસ ડોક્ટરો મળી આવ્યા છે. જ્યારે સુરતમાં 9, ગીર સોમનાથમાં 3 અને સુરેન્દ્રનગરમાં 2 શંકાસ્પદ વ્યક્તિઓની ઓળખ થઈ છે. બાકીના જિલ્લાઓમાં એક-એક શંકાસ્પદ તબીબ મળી આવ્યો છે. આરોગ્ય મંત્રી પ્રફુલ પાનસેરિયાએ જણાવ્યું હતું કે, સતત 15 દિવસ સુધી આરોગ્ય વિભાગ અને પોલીસ દ્વારા સંયુક્ત રીતે તપાસ કરવામાં આવી હતી. આ અભિયાનમાં 38 વ્યક્તિઓ શંકાના દાયરામાં આવ્યા હતા, જેમાંથી 35 સામે FIR નોંધાઈ છે. બાકીના શંકાસ્પદ લોકો સામે પણ કાર્યવાહી ચાલુ છે.

વિશેષ અભિયાન ઉપરાંત આવી ગેરકાયદે પ્રવૃત્તિઓ પર નજર રાખવા જિલ્લા સ્તરે સમિતિઓ પણ બનાવવામાં આવી છે. આ સમિતિઓમાં તાલુકા આરોગ્ય અધિકારીઓ, પોલીસ કર્મચારીઓ, આરોગ્ય સુપરવાઇઝર અને તલાટી-કમ-મંત્રીઓનો સમાવેશ થાય છે. સ્થાનિક સ્તરે માહિતી એકત્રિત કરી શંકાસ્પદ તબીબોની ઓળખ અને તેમની પ્રવૃત્તિઓ પર નજર રાખવાની જવાબદારી તેમને સોંપવામાં આવી છે. તપાસ દરમિયાન કેટલાક શંકાસ્પદ તબીબો ટીમ પહોંચે તે પહેલાં જ ક્લિનિક બંધ કરીને ફરાર થઈ ગયા હોવાનું પણ સામે આવ્યું છે. આરોગ્ય વિભાગ અને પોલીસ તેમની શોધખોળ કરી રહ્યાં છે. તહેવારોની સિઝન બાદ પણ કાર્યવાહી ચાલુ રહેશે.

આરોગ્ય વિભાગે લોકોને અપીલ કરી છે કે માન્ય લાયકાત વગર સારવાર આપતા લોકો અંગે નજીકના પોલીસ સ્ટેશન, પ્રાથમિક આરોગ્ય કેન્દ્ર (PHC), સામુદાયિક આરોગ્ય કેન્દ્ર (CHC) અથવા SOGને જાણ કરે. સાથે જ નાગરિકોને બિનલાયકાત ધરાવતા વ્યક્તિઓ પાસે સારવાર ન કરાવવા અને સરકારી આરોગ્ય કેન્દ્રોમાં ઉપલબ્ધ નિઃશુલ્ક સારવાર, દવાઓ તથા તપાસ સેવાઓનો લાભ લેવા અપીલ કરી છે.