રાજ્યના 2 વરિષ્ઠ IAS અધિકારીઓની બદલી: શાલિની અગ્રવાલ GUVNLના નવા MD, રાજેન્દ્ર કુમારને GSRTCનો વધારાનો હવાલો
છેલ્લું અપડેટ : 22 Jan 2026
ગુજરાત રાજ્ય સરકારે વહીવટી તંત્રમાં ધરખમ ફેરફાર કરતા રાજ્યના બે વરિષ્ઠ IAS અધિકારીઓની તાત્કાલિક અસરથી બદલી કરી છે. આ ફેરફારમાં સુરતના મ્યુનિસિપલ કમિશનર શાલિની અગ્રવાલની બદલી સૌથી મહત્વની માનવામાં આવી રહી છે.
નવી નિયુક્તિની વિગતો
સુરત મ્યુનિસિપલ કમિશનર તરીકે સફળ સેવા આપનાર વર્ષ 2005ની બેચના IAS અધિકારી શાલિની અગ્રવાલને હવે નવી જવાબદારી સોંપવામાં આવી છે. તેમને વડોદરા સ્થિત ગુજરાત ઉર્જા વિકાસ નિગમ લિમિટેડ (GUVNL) ના મેનેજિંગ ડિરેક્ટર (MD) તરીકે નિયુક્ત કરવામાં આવ્યા છે.
શાલિની અગ્રવાલના સ્થાને હવે એમ. નાગરાજનને સુરતના નવા મ્યુનિસિપલ કમિશનર બનાવવામાં આવ્યા છે. એમ. નાગરાજન અગાઉ વિવિધ મહત્વના હોદ્દાઓ પર રહી ચૂક્યા છે અને હવે તેઓ હીરાનગરી સુરતનો વહીવટ સંભાળશે.
વધારાનો હવાલો
આ ઉપરાંત, રાજ્ય સરકારે રાજેન્દ્ર કુમારને ગુજરાત રાજ્ય માર્ગ વાહન વ્યવહાર નિગમ (GSRTC)ના મેનેજિંગ ડિરેક્ટર તરીકેનો વધારાનો ચાર્જ સોંપ્યો છે. આગામી સમયમાં વહીવટી કામગીરીમાં ગતિ લાવવા અને સરકારી યોજનાઓના અમલીકરણ માટે આ બદલીઓ કરવામાં આવી હોવાનું માનવામાં આવે છે.