બોટાદ જિલ્લા પંચાયતના કારોબારી ચેરમેન સામે ફરિયાદ 

બોટાદ જિલ્લા પંચાયતના કારોબારી ચેરમેન રાજુભાઈ દીપસંગભાઈ ચૌહાણ સામે ગંભીર આરોપો સાથે કોર્ટમાં ફરિયાદ નોંધાઈ છે. ગઢડા તાલુકાના લાખણકા ગામના લાલજીભાઈ શાંતિભાઈ કણબીએ આ ફરિયાદ નોંધાવી છે. ફરિયાદમાં જણાવ્યા અનુસાર, રાજુભાઈ ચૌહાણે લાલજીભાઈની પત્નીને મૈત્રી કરાર કરવાની લાલચ આપી હતી. આ બહાને તેમણે મહિલા સાથે પ્રેમસંબંધ બાંધ્યો હતો.

ફરિયાદીએ પોતાના આરોપોને સમર્થન આપવા કોર્ટમાં કોલ રેકોર્ડિંગના પુરાવા પણ રજૂ કર્યા છે. લાલજીભાઇએ સરકાર પાસેથી ઝડપી ન્યાયની માંગણી કરી છે. આ ઘટનાથી સમગ્ર વિસ્તારમાં રાજકીય માહોલ ગરમાયો છે. ઉલ્લેખનીય છે કે કારોબારી ચેરમેન રાજુભાઈ ચૌહાણ ભાજપના સદસ્ય છે. આ મામલે તેમની પ્રતિક્રિયા મેળવવાના પ્રયત્નો કરવામાં આવ્યા હતા. જોકે, તેમણે કેમેરા સામે કે ટેલિફોન પર કોઈ પ્રતિક્રિયા આપવાનો ઇનકાર કર્યો છે. હાલ આ કેસની વધુ તપાસ ચાલી રહી છે.