Chhota Udepur news : બોડેલીમાં દારૂબંધીના લીરેલીરાં, બુટલેગરની કારને અકસ્માત થતા લોકોએ દારૂની લૂંટ મચાવી
છેલ્લું અપડેટ : 09 Nov 2025
Chhota Udepur news : છોટાઉદેપુર જિલ્લાના બોડેલી ખાતે ગઈકાલે શનિવારે બુટલેગર અને પોલીસ વચ્ચેના પકડદાવમાં ભારે હોબાળો મચી ગયો હતો. પોલીસની વોચથી બચવા માટે બુટલેગરે કારને પૂરપાટ ભગાવતા અકસ્માત સર્જાયો હતો. કારમાં ઇંગ્લિશ દારૂનો જથ્થો ભર્યો હતો. અકસ્માત થતા કારની ડિક્કી ખુલી ગઈ હતી. અને લોકોએ તક ઝડપી લઈ દારૂ લૂંટવા માટે રીતસરના પડાપડી કરવા લાગ્યા! આ ઘટનાનો વીડિયો સોશિયલ મીડિયા પર વાયરલ થઈ રહ્યો છે.
કારમાં દારૂની બાતમી મળતા પોલીસે ગોઠવી વૉચ
પ્રાપ્ત માહિતી અનુસાર, બોડેલીના અલીપુરા ચારરસ્તાના ભરચક વિસ્તારમાં પોલીસને બાતમી મળી હતી કે એક કારમાં મોટા પ્રમાણમાં ઇંગ્લિશ દારૂનો જથ્થો લાવવામાં આવી રહ્યો છે. આ બાતમીના આધારે પોલીસે તાત્કાલિક વૉચ ગોઠવી હતી અને બાતમીવાળી કારને કોર્ડન કરવાની કોશિશ કરી હતી. પોલીસને જોતા જ કાર ચલાવતા બુટલેગરે કારને રોકવાને બદલે પૂરઝડપે ભગાડી મૂકી હતી, જેના કારણે પોલીસ અને બુટલેગર વચ્ચે ફિલ્મી ઢબે પીછો શરૂ થયો હતો.
અકસ્માત થતા એક બુટલેગર ફરાર, બીજી કાર અને બાઈક અડફેટમાં
અલીપુરા ચાર રસ્તા જેવા ભરચક વિસ્તારમાં કારચાલકે ઝડપ પર કાબૂ ગુમાવતા કારનો અકસ્માત થયો હતો. કારે રસ્તા પર જતી અન્ય એક કાર અને એક બાઇકને અડફેટે લીધી હતી. આ અથડામણના કારણે કાર રોકાઈ જતાં તેમાં સવાર બે બુટલેગરો પૈકી એક બુટલેગર ભાગી છૂટવામાં સફળ રહ્યો હતો.
'ઓપન બાર' જેવો માહોલ, લોકોએ કરી દારૂની લૂંટ
અકસ્માત બાદ કારમાં ભરેલો દારૂનો જથ્થા પર લોકોની નજર પડી. આ દ્રશ્ય જોતા જ આસપાસના લોકો સ્થળ પર એકઠા થઈ ગયા હતા અને દારૂ અને બિયરની બોટલો લૂંટવા માટે પડાપડી કરવા લાગ્યા હતા. વીડિયોમાં સ્પષ્ટપણે જોઈ શકાય છે કે અનેક લોકો દારૂની બોટલો લઈને ઘટનાસ્થળેથી ભાગી રહ્યા છે.
પોલીસે એક બુટલેગરને ઘટનાસ્થળેથી ઝડપી પાડ્યો હતો. આ સાથે જ કાર, બચેલો ઇંગ્લિશ દારૂનો જથ્થો જપ્ત કરી કાયદેસરની કાર્યવાહી હાથ ધરી છે. જોકે, આ ભરચક વિસ્તારમાં સર્જાયેલા અકસ્માત અને દારૂની લૂંટના બનાવથી સમગ્ર પંથકમાં ચર્ચાએ જોર પકડ્યું છે.
