VIDEO: શિક્ષણ ધામ કે અખાડો? સેવન્થ ડે સ્કૂલમાં વિદ્યાર્થીઓ વચ્ચેની મારામારી મુદ્દે DEO કચેરીએ હોબાળો, જાણો શું છે સમગ્ર મામલો
છેલ્લું અપડેટ : 06 Feb 2026
VIDEO: અમદાવાદની જાણીતી સેવન્થ-ડે એડવેન્ટિસ્ટ સ્કૂલ છેલ્લા કેટલાક સમયથી શિક્ષણને બદલે વિદ્યાર્થીઓ વચ્ચે થતી મારામારી અને હિંસાની ઘટનાઓને કારણે વિવાદના વમળમાં ફસાઈ છે. શાળામાં સતત વધી રહેલી ગુંડાગીરી અને સુરક્ષાના અભાવે વાલીઓ અને વિદ્યાર્થીઓમાં ભયનો માહોલ છે. આ ગંભીર મુદ્દે આજે NSUI દ્વારા અમદાવાદ શહેર શિક્ષણ અધિકારી (DEO)ને આવેદન પત્ર આપી કડક કાર્યવાહીની માંગણી સાથે વિરોધ પ્રદર્શન કરવામાં આવ્યું હતું.
શાળા વ્યવસ્થાપન સામે આક્રોશ
NSUIના નેતા વિક્રમસિંહ ગોહિલે આક્ષેપ કર્યો હતો કે શાળાની અંદર થતી મારામારી રોકવામાં શિક્ષકો, પ્રિન્સિપાલ અને ટ્રસ્ટીઓ સંપૂર્ણપણે નિષ્ફળ રહ્યા છે. શાળાનું શિસ્ત જાળવવામાં અને વિદ્યાર્થીઓને સુરક્ષિત વાતાવરણ પૂરું પાડવામાં દેખીતી બેદરકારી દાખવવામાં આવી રહી છે. જો શિક્ષણના ધામમાં જ ગુંડાગીરી ચાલતી હોય તો વિદ્યાર્થીઓનું ભવિષ્ય કઈ દિશામાં જશે તે એક મોટો પ્રશ્ન છે.
મુખ્ય માંગણીઓ:
બેદરકાર પ્રિન્સિપાલ અને ટ્રસ્ટીઓ દ્વારા તાત્કાલિક રાજીનામું આપવામાં આવે.
શાળામાં CCTV કેમેરા અને સક્ષમ સુરક્ષા કર્મચારીઓની નિમણૂક કરી શિસ્તના કડક નિયમો લાગુ કરવામાં આવે.
સમગ્ર ઘટનાની સ્વતંત્ર તપાસ કરાવી જવાબદારો સામે કાયદેસરના પગલાં લેવામાં આવે.
DEO અને NSUIની પ્રતિક્રિયા અમદાવાદ શહેર શિક્ષણ અધિકારી રોહિત ચૌધરીએ આ મામલે તપાસ કરવાની ખાતરી આપી છે. બીજી તરફ, NSUI એ ચીમકી ઉચ્ચારી છે કે જો આગામી દિવસોમાં શાળા સામે કડક પગલાં લેવામાં નહીં આવે, તો તેઓ વધુ ઉગ્ર આંદોલન અને વિરોધ પ્રદર્શનો હાથ ધરશે.