Ahmedabad news: પત્ની હોવા છતાં વીમા કંપનીના કર્મીએ બીજા લગ્ન કર્યા, હવે દર મહિને રૂ.50,000 ભરણપોષણ ચૂકવવા કોર્ટનો આદેશ

પ્રથમ લગ્ન હયાત હોવા છતાં પત્નીને તરછોડી બીજી સ્ત્રી સાથે લગ્ન કરનાર વીમા કંપનીના કર્મચારી પતિને અમદાવાદ ગ્રામ્યની કોર્ટે ઘરેલુ હિંસાના કેસમાં તરછોડેલી પહેલી પત્ની, સગીર બાળકીના ભરણપોષણ અને વૈકલ્પિક ઘરના ભાડા સહિત કુલ રૂ. 50,000 ચૂકવવાનો આદેશ કર્યો છે. સાથે જ પતિ અને બીજી પત્નીને પહેલી પત્ની પ્રત્યે કોઈપણ પ્રકારની શારીરિક કે માનસિક હિંસા ન આચરવાનો પણ કડક આદેશ કર્યો હતો.

 

અમદાવાદ (ગ્રામ્ય)ના એડિશનલ ચીફ જ્યુડિશિયલ મેજિસ્ટ્રેટ ગૌરવ બલદેવ સિયાગે દ્વારા ઘરેલુ હિંસા અધિનિયમ (ડી.વી. એક્ટ, 2005)ના એક કેસમાં અરજદાર પીડિતાની તરફેણમાં કરેલા હુકમ દરમિયાનની કાનૂની લડાઈમાં અરજદાર પક્ષ તરફથી વકીલ સલીમ આઈ. સૈયદ દ્વારા ધારદાર રજૂઆતો, મજબૂત પુરાવાઓ અને દલીલો રજૂ કરવામાં આવ્યા હતા. જેને કોર્ટે માન્ય રાખ્યા છે.

 

કેસની વિગતો અનુસાર, ઇન્શ્યોરન્સ કંપનીમાં ઉચ્ચ હોદ્દા પર કાર્યરત સામાવાળા (પતિ)એ અરજદાર સાથેના પ્રથમ લગ્ન ચાલુ હોવા છતાં કોઈ પણ વ્યાજબી કારણ વિના પીડિતાને તરછોડી દીધી હતી અને અન્ય સ્ત્રી સાથે બીજા લગ્ન કરી લીધા હતા. આ બાબતને ગંભીરતાથી લઈને કોર્ટે પતિ અને તેની બીજી પત્નીને શારીરિક, માનસિક કે આર્થિક કોઈપણ પ્રકારની ઘરેલુ હિંસા આચરવા સામે સખત મનાઈ ફરમાવી છે.

અદાલતે પીડિત પત્ની અને સગીર બાળકીના હિતમાં આદેશ આપતા જણાવ્યું છે કે, પતિએ અરજદારને ભરણપોષણ તથા વૈકલ્પિક આવાસના ભાડા પેટે સંયુક્ત રીતે દર મહિને કુલ રૂ.50,000 ચૂકવવા પડશે. આ રકમમાં રૂ.15,000 વૈકલ્પિક રહેઠાણના ભાડા પેટે અને બાકીની રકમ સગીર બાળકી તથા પત્નીના ભરણપોષણ માટે નક્કી કરવામાં આવી છે. આ માસિક રકમ દર મહિનાની 10મી તારીખ પહેલાં સીધી જ પત્નીના બેંક ખાતામાં જમા કરાવવાની રહેશે.

 

આ ઉપરાંત કોર્ટે બાળકીની શારીરિક અને કાનૂની કસ્ટડી માતા પાસે જ રાખવાનો આદેશ આપ્યો છે. જ્યારે સસરા અને નણંદ વિરુદ્ધ પૂરતા પુરાવા ન હોવાથી તેમની સામેની અરજી રદ કરાઈ છે. કોર્ટે પતિને કાનૂની કાર્યવાહીના ખર્ચ પેટે અલગથી રૂ.10,000 ચૂકવવાનો પણ હુકમ કર્યો છે.