Ahmedabad news: પોપ્યુલર બિલ્ડરના રમણ પટેલની સજા મોકુફીની અરજી હાઇકોર્ટે ફગાવી, સેશન્સ કોર્ટે ફટકારી છે 4 વર્ષની સજા
છેલ્લું અપડેટ : 15 Jun 2026
પોપ્યુલર બિલ્ડરના રમણ પટેલે જમીન કૌભાંડ કેસમાં પડેલી સજા રદ કરવા કરેલી અરજી હાઇકોર્ટે ફગાવી દીધી છે. સાણંદ કોર્ટે વર્ષ 2025માં રમણ પટેલને ખોટા દસ્તાવેજના કેસમાં 4 વર્ષની સજા અને દોઢ લાખનો દંડ ફટકાર્યો હતો. સેસન્સ કોર્ટના ચુકાદાને રમણ પટેલે હાઇકોર્ટમાં પડકાર્યો હતો. જેમાં સજા રદ કરવા દાદ માગી હતી અને ચુકાદા પર સ્ટેની માંગણી કરી હતી. આ મામલે હાઇકોર્ટે રમણ પટેલની સજા રદ કરવા કે સ્ટેની માંગણી બંનેને ફગાવી દીધી છે.
બિલ્ડરના રમણ પટેલની સજા મોકુફીની અરજી હાઇકોર્ટે ફગાવી
સાણંદમાં ચેખલા ગામમાં બનાવટી દસ્તાવેજ બનાવીને જમીન પચાવી પાડવાના કેસમાં રમણ પટેલને 2025ના રોજ સેશન્સ કોર્ટે છેતરપિંડી અને પૂર્વ આયોજીત કાવતરુના ગુનામાં 4 વર્ષની સજા ફટકારી હતી. નવી શરતની જમીનને જૂની શરતમાં ફેરવવા આરોપી રમણ પટેલે મામલતદારનો નકલી હુકમ બનાવીને જમીન પચાવી પાડી હતી. બિલ્ડર સામે સરકારી દસ્તાવેજો સાથે છેડછાડ અને છેતરપિંડીની ફરિયાદ થતા તેની ધરપકડ કરવામા આવી છે.
ઉંમર અને બિમાર હોવાનું કહી સજા રદ કરવા દાદ માગેલી
રમણ પટેલ સામે તપાસમાં કુલ 52 કંપનીઓ બનાવી હોવાનું બહાર આવ્યું છે. છેલ્લા 40 વર્ષથી રમણ પટેલ સામે ફરિયાદો થઇ છે. બિલ્ડરે પોતાની ઉંમર અને બિમાર હોવાનું કહીને સજા રદ કરવા દાદ માગી હતી.
સરકાર તરફથી તેનો વિરોધ કરતા એવી દલીલ કરી હતી કે, આરોપી સામે જમીન હડપવાના અનેક ગુના નોંધાયા છે. તે રાજકીય વગ ધરાવે છે. તેની સામે જમીન સંબંધિત 10 કરતા વધુ ગુના નોંધાયા છે. હાઇકોર્ટે સરકારની દલીલોને ગ્રાહ્ય રાખીને રમણ પટેલની સજા રદ કરવા ઇન્કાર કર્યો છે.
