30 કરોડની છેતરપિંડીના કેસમાં ફિલ્મમેકર વિક્રમ ભટ્ટને મોટી રાહત, સુપ્રીમ કોર્ટે આપ્યા વચગાળાના જામીન

બોલીવૂડના સૌથી પ્રખ્યાત ડાયરેક્ટર્સમાંથી એક વિક્રમ ભટ્ટ અને તેમની પત્ની શ્વેતાંબરી ભટ્ટ ઘણા દિવસોથી છેતરપિંડીના કેસમાં સમાચારમાં છે. થોડા દિવસો પહેલા ફિલ્મમેકર અને તેમની પત્નીની રાજસ્થાન પોલીસે 30 કરોડ રૂપિયાની છેતરપિંડીના કેસમાં ધરપકડ કરી હતી. હવે સુપ્રીમ કોર્ટે વિક્રમ અને તેમની પત્નીને વચગાળાના જામીન આપ્યા છે.

આ મામલે સુપ્રીમ કોર્ટે જણાવ્યું હતું કે પૈસા વસૂલવા માટે ફોજદારી કેસનો ઉપયોગ નથી કરી શકાતો. સુપ્રીમ કોર્ટે 30 કરોડ રૂપિયાની છેતરપિંડીના કેસમાં ધરપકડ કરાયેલ ફિલ્મમેકર વિક્રમ ભટ્ટ અને તેમની પત્ની શ્વેતાંબરી ભટ્ટને વચગાળાના જામીન આપ્યા છે.

30 કરોડ રૂપિયાની છેતરપિંડીના આરોપો

સુનાવણી દરમિયાન વરિષ્ઠ વકીલ મુકુલ રોહતગીએ દલીલ કરી હતી કે તપાસ એજન્સી સંડોવાયેલા દરેક વ્યક્તિને જેલમાં નથી મોકલી શકતી. વકીલે પૂછ્યું, શું ચાલી રહ્યું છે? તમે એક ફિલ્મમેકર અને તેમની પત્નીને આ રીતે જેલમાં કેવી રીતે રાખી શકો છો? મુકુલની દલીલના જવાબમાં વિપક્ષે દલીલ કરી હતી કે આ કેસ સરળ નથી અને 30 કરોડ રૂપિયાની છેતરપિંડીના આરોપો મામૂલી નથી.

સુપ્રીમ કોર્ટે મોટી રાહત આપી

કેસની સુનાવણી કરતી બેન્ચમાં CJI સૂર્યકાંત સાથે બેઠેલા જસ્ટિસ જોયમાલા બાગચીએ ટિપ્પણી કરી હતી કે પૈસા વસૂલવા માટે ફોજદારી કેસોનો ઉપયોગ નથી કરી શકાતો. ત્યારબાદ કોર્ટે નોટિસ જારી કરી અને વિક્રમ ભટ્ટ અને તેમની પત્નીને જામીન બોન્ડ ભરવાની શરતે તાત્કાલિક વચગાળાના જામીન આપવાનો નિર્દેશ આપ્યો, જે કપલ માટે મોટી રાહત હતી.

વિક્રમ અને તેમની પત્ની સામે છેતરપિંડી અને ક્રિમીનલ બ્રીચ ઓફ ટ્રસ્ટની ફરિયાદ દાખલ કરવામાં આવી હતી. ફરિયાદમાં આરોપ મૂકવામાં આવ્યો હતો કે ફિલ્મ પ્રોજેક્ટ માટે એકત્રિત કરાયેલા ભંડોળનો દુરુપયોગ કરવામાં આવ્યો હતો. વિક્રમ અને શ્વેતામ્બરી પર 30 કરોડ રૂપિયાના ભંડોળનો દુરુપયોગ કરવાનો આરોપ હતો. એવો આરોપ છે કે ભટ્ટ પરિવારે અલગ અલગ નામે નકલી બિલ તૈયાર કર્યા હતા અને ફરિયાદી પાસેથી પૈસા ટ્રાન્સફર કરાવ્યા હતા.