રામ ચરણ અને ઉપાસનાએ જણાવ્યા તેમના ટ્વીન્સના નામ, અર્થ સમજાવતા કહ્યું- 'અમે ઈચ્છતા હતા કે..'

રામ ચરણ અને ઉપાસના કોનિડેલાએ 31 જાન્યુઆરીના રોજ તેમના જોડિયા બાળકો એક પુત્ર અને એક પુત્રીનું સ્વાગત કર્યું હતું અને હવે તેમણે સત્તાવાર રીતે તેમના નામોની જાહેરાત કરી છે. આ કપલે તેમના હૈદરાબાદના ઘરે એક સિમ્પલ છતાં ભાવનાત્મક નામકરણ સમારોહમાં તેમના બાળકોને  નામ આપ્યા. બંનેના નામ યુનિક છે અને મોટી પુત્રી ક્લિન કારા જેવા જ અર્થપૂર્ણ પણ છે.

બાળકોના નામ શું છે?

રામ ચરણના પુત્રનું નામ શિવરામ રાખવામાં આવ્યું છે અને તેની પુત્રીનું નામ અનવીરા દેવી રાખવામાં આવ્યું છે. તાજેતરના ઇન્ટરવ્યુમાં રામ અને ઉપાસનાએ આ નામો પાછળની લાગણીઓ, કૌટુંબિક સંબંધો અને આધ્યાત્મિક મહત્ત્વ વિશે વિગતવાર જણાવ્યું હતું. રામ ચરણે કહ્યું કે તેના બાળકોના નામ પસંદ કરવા એ માત્ર ઔપચારિકતા નહતી, પરંતુ એક ઊંડો વ્યક્તિગત અને આધ્યાત્મિક નિર્ણય હતો. તેણે જણાવ્યું, "અમે બંનેએ આ વિશે ઊંડાણપૂર્વક વિચાર્યું. આ અમારો નિર્ણય હતો, પરંતુ અમારા માતા-પિતા સમગ્ર પ્રક્રિયાનો એક મહત્ત્વપૂર્ણ ભાગ હતા. અમારી સંસ્કૃતિમાં વડીલોના આશીર્વાદ અને માર્ગદર્શનનું ઘણું મહત્ત્વ છે. અમે ઈચ્છતા હતા કે અમારા બાળકોના નામ પરંપરા, આધ્યાત્મિકતા અને કૌટુંબિક વારસાને પ્રતિબિંબિત કરે."

બાળકોના નામોનો અર્થ

તેણે આગળ જણાવ્યું કે તેમના પુત્રનું નામ શિવરામ, બે શાશ્વત આદર્શોથી ભગવાન શિવ અને ભગવાન રામથી પ્રેરિત છે. આ નામ સંયમ સાથે શક્તિ અને ભક્તિ સાથે ધર્મનિષ્ઠાનું પ્રતીક છે. રામે એમ પણ કહ્યું કે, આ નામ તેમના પિતાના જન્મ નામ, શિવ શંકર વર પ્રસાદનું પણ સન્માન કરે છે. આમ, આ નામ ફક્ત આધ્યાત્મિકતા સાથે જ નહીં પરંતુ કૌટુંબિક વારસો અને કૃતજ્ઞતા સાથે પણ સંકળાયેલું છે. તેની પુત્રીના નામ વિશે બોલતા, તેણે કહ્યું કે અનવીરા દેવી નામ અમર્યાદિત હિંમત અને દૈવી સ્ત્રી શક્તિનું પ્રતિનિધિત્વ કરે છે. વીરાનો અર્થ બહાદુરી થાય છે, જ્યારે અન તેને અનંત અને સતત બનાવે છે. દેવી શબ્દ જાણી જોઈને ઉમેરવામાં આવ્યો હતો જેથી યાદ અપાવી શકાય કે શક્તિ અને કરુણા સાથે ચાલી શકે છે.

ઉપાસનાએ પોતાનો અનુભવ શેર કર્યો

કપલના મતે આ નામો ફક્ત ઓળખ નથી, પરંતુ તેમના બાળકો માટે આશીર્વાદ અને જીવન મૂલ્યો, શક્તિ, પ્રેમ અને હિંમતની આકાંક્ષાઓ માટેની ઈચ્છા છે. ઉપાસના કોનિડેલાએ વાતચીતમાં બીજી વખત માતા બનવાનો પોતાનો અનુભવ પણ શેર કર્યો હતો. તેણે કહ્યું કે પહેલીવાર માતા બનવું સુંદર અને પડકારજનક બંને હતું કારણ કે બધું નવું હતું. તેણે કહ્યું, "આ વખતે હું વધુ શાંત અને સ્થિર અનુભવું છું. મેં ઘણી બિનજરૂરી ચિંતાઓ છોડી દેવાનું શીખી લીધું છે. હવે હું નાની નાની બાબતોથી ગભરાતી નથી. બાળકોને આ સમય દરમિયાન સ્થિરતા, દિનચર્યા અને બિનશરતી પ્રેમની જરૂર હોય છે."

રામ કરે છે ઉપાસનાની મદદ

તેણે જોડિયા બાળકોની સંભાળ રાખવાના અનુભવને જાદુઈ ગણાવ્યો. તેણે સ્વીકાર્યું કે તેઓ ફક્ત થોડા અઠવાડિયાના છે, તેથી તે ખૂબ જલ્દી કોઈ નિષ્કર્ષ નથી કાઢવા માંગતી, પરંતુ તેના ત્રણેય બાળકોને એકસાથે જોવું તેના માટે ખૂબ જ ભાવનાત્મક અને સંતોષકારક અનુભવ છે. તેણે એમ પણ કહ્યું કે રામ આ વખતે પહેલા કરતાં વધુ સક્રિય અને સહકારી છે, ખાસ કરીને તેની મોટી પુત્રી ક્લિન કારા સાથે. 31 જાન્યુઆરીએ આ કપલે જોડિયા બાળકોના જન્મની ખુશી શેર કરવા માટે એક સંયુક્ત નિવેદન બહાર પાડ્યું. રામ ચરણે ત્રણેય બાળકોના આશીર્વાદ બદલ આભાર વ્યક્ત કર્યો અને કહ્યું કે તે તેના ફેન્સ, પરિવાર અને શુભેચ્છકોના સમર્થન માટે ખૂબ આભારી છે.

રામ ચરણ અને ઉપાસનાના લગ્ન ક્યારે થયા?

તાજેતરમાં એવો અહેવાલ આવ્યો હતો કે દંકપલે જોડિયા બાળકોના જન્મનો સમય નક્કી કરવા માટે એક જ્યોતિષીની સલાહ લીધી હતી અને જન્મ પહેલા એક મંદિરમાં ખાસ પ્રાર્થના પણ કરી હતી. રામ અને ઉપાસનાએ ડિસેમ્બર 2011માં સગાઈ કરી હતી અને જૂન 2012માં લગ્ન કર્યા હતા. લાંબા સમય સુધી મિત્રો રહ્યા પછી, તેઓએ ડેટિંગ શરૂ કર્યું અને પછી લગ્ન કર્યા. જૂન 2023માં તેઓએ તેમની પ્રથમ પુત્રી ક્લિન કારાનું સ્વાગત કર્યું. હવે બે નવા સભ્યોના આગમન સાથે આ પરિવારની ખુશી વધી છે.