વિક્કી કૌશલે શાહરૂખ-સલમાન ખાન જેવા સુપરસ્ટારને આપી માત, રચ્યો આ ઇતિહાસ

10 વર્ષના કરિયરમાં વિક્કી કૌશલની 'છાવા' ફિલ્મે તેને એવી ભેટ આપી છે જે આજ સુધી કોઈ અન્ય ફિલ્મે આપી નથી. 'છાવા' દ્વારા વિક્કી દરરોજ નવો ઇતિહાસ રચી રહ્યો છે. એટલું જ નહીં વિક્કીની ફિલ્મે શાહરૂખ ખાન, સલમાન ખાન, સની દેઓલ, રણબીર કપૂર અને બોબી દેઓલને પણ પાછળ છોડી દીધા છે. શાહરૂખ ખાનની પઠાણ અને જવાને 1000 કરોડ રૂપિયાની કમાણી કરી છે. જ્યારે રણબીર કપૂર અને બોબી દેઓલની ફિલ્મ 'એનિમલ'એ 900 કરોડ રૂપિયાથી વધુની કમાણી કરી છે. પરંતુ 'છાવા' એ જે કામ કર્યું છે, તે પહેલાં કોઈ મોટો સ્ટાર તે કરી શક્યો નથી.

ઐતિહાસિક ડ્રામા ફિલ્મ 'છાવા' એ બોક્સ ઓફિસ પર વધુ એક મોટો ઇતિહાસ રચ્યો છે. વિક્કી કૌશલ અભિનીત આ ફિલ્મ બુક માય શો પર 12 મિલિયનથી વધુ ટિકિટ વેચનારી પહેલી હિન્દી ફિલ્મ બની ગઈ છે. આ ફિલ્મે 850 કરોડ રૂપિયાની "સ્ત્રી 2" જેવી બ્લોકબસ્ટર રિલીઝને પણ પાછળ છોડી દીધી છે. બુક માય શોના સીઓઓ આશિષ સક્સેનાએ ફિલ્મની સફળતાને મોટી સિદ્ધિ ગણાવી.

વિક્કીની 'છાવા'ની વધતી માંગ

તેમણે છત્રપતિ સંભાજી મહારાજ તરીકે વિક્કી કૌશલની ભૂમિકા વિશે પણ વાત કરી અને કહ્યું કે તે તેમના શ્રેષ્ઠ અભિનયમાંનો એક છે. તેમણે કહ્યું કે મહારાણી યેસુબાઈ તરીકે રશ્મિકા મંદન્નાની ભૂમિકા ફિલ્મમાં ભાવનાત્મક ઊંડાણ લાવે છે. મુંબઈ, પુણે, દિલ્હી-એનસીઆર, હૈદરાબાદ, બેંગલુરુ, નાગપુર, નાસિક, અમદાવાદ, કોલકાતા અને લખનૌ જેવા શહેરોમાં 'છાવા' ની ભારે માંગ છે. દર્શકો વારંવાર ફિલ્મ જોવાનો આનંદ માણી રહ્યા છે.

'છાવા' 800 કરોડ ક્લબમાં જોડાશે

લક્ષ્મણ ઉતેકર દ્વારા દિગ્દર્શિત અને દિનેશ વિજનની મેડોક ફિલ્મ્સ દ્વારા નિર્મિત, 'છાવા' છત્રપતિ સંભાજી મહારાજની વાર્તા દર્શાવે છે. શિવાજી સાવંતની મરાઠી નવલકથા 'છાવા' પર આધારિત આ ફિલ્મ ઔરંગઝેબના શાસનકાળમાં મુઘલ સામ્રાજ્ય સાથેના તેમના સંઘર્ષ પર કેન્દ્રિત છે. આ ફિલ્મ છેલ્લા એક મહિનાથી સિનેમાઘરોમાં સતત ચાલી રહી છે. આ ફિલ્મ જોવા માટે દર્શકો સતત થિયેટરોમાં જઈ રહ્યા છે. 14 ફેબ્રુઆરીએ રિલીઝ થયેલી 'છાવા'એ અત્યાર સુધીમાં વિશ્વભરમાં 750 કરોડ રૂપિયાથી વધુની કમાણી કરી છે. એવી અપેક્ષા છે કે 'છાવા' ટૂંક સમયમાં 8૦૦ કરોડ રૂપિયાના ક્લબમાં જોડાશે.