દિવાળીના દિવસે રણવીર સિંહના પરિવારમાં શોક, 96 વર્ષની વયે નાના ડૉ. રામ હિંગોરાનીનું નિધન

દિવાળીના તહેવારની ઉજવણી વચ્ચે બોલિવૂડ અભિનેતા રણવીર સિંહના પરિવારમાં શોકની લાગણી છવાઈ ગઈ છે. અભિનેતાના નાના ડૉ. રામ હિંગોરાનીનું 96 વર્ષની વયે નિધન થયું છે. અહેવાલો અનુસાર, તેમણે દિવાળીના દિવસે લક્ષ્મી પૂજાના પવિત્ર સમયે અંતિમ શ્વાસ લીધા હતા. આ સમાચારથી પરિવારજનો અને નજીકના લોકોમાં શોક વ્યાપી ગયો છે.

કઝિન બહેને સોશિયલ મીડિયા પર આપી જાણકારી

રણવીર સિંહની કઝિન બહેન સૌમ્યા હિંગોરાની ઠાકરેએ સોશિયલ મીડિયા પર ભાવુક પોસ્ટ શેર કરીને ડૉ. રામ હિંગોરાનીના નિધનની જાણકારી આપી હતી. તેમણે પોતાના ઇન્સ્ટાગ્રામ એકાઉન્ટ પર નાના સાથેની બાળપણ અને યુવાનીની કેટલીક યાદગાર તસવીરો પણ પોસ્ટ કરી હતી. આ તસવીરોમાં રણવીર સિંહ પણ પોતાના નાના સાથે પ્રેમભરી પળો વિતાવતો જોવા મળે છે. સૌમ્યાએ પોસ્ટમાં લખ્યું હતું કે, તેમના દાદુ ડૉ. રામ દિવાળીના દિવસે પરિવારને છોડીને દાદી પાસે ચાલ્યા ગયા છે. તેમણે લક્ષ્મી પૂજાના સમયે વિદાય લીધી, જે દિવસનો સૌથી શુભ સમય છે. સૌમ્યાએ ભાવુક શબ્દોમાં લખ્યું કે તેમને વિશ્વના સૌથી વ્હાલા દાદુ બનવા બદલ આભાર. તેમણે દાદુ સાથે વિતાવેલી યાદોને યાદ કરતાં ફરી મળવાની આશા પણ વ્યક્ત કરી હતી.

નાના સાથે રણવીરનું હતું ખાસ જોડાણ

રણવીર સિંહ અને તેમના નાના વચ્ચે ખૂબ જ ગાઢ સંબંધ હતો. અભિનેતા ઘણીવાર પોતાના નાના સાથેની ખાસ પળો સોશિયલ મીડિયા પર શેર કરતો રહ્યો છે. ફિલ્મ 'રોકી ઔર રાની કી પ્રેમ કહાની'ના પ્રમોશન દરમિયાન પણ રણવીરે નાના સાથેનો એક વીડિયો શેર કર્યો હતો. આ વીડિયોમાં 93 વર્ષની ઉંમરે પણ ડૉ. રામ હિંગોરાની રણવીર સાથે ફિલ્મના લોકપ્રિય ગીત 'ઝુમકા ગિરા રે' પર ઉત્સાહથી ડાન્સ કરતા જોવા મળ્યા હતા. તેમનો આ મસ્તીભર્યો અંદાજ સોશિયલ મીડિયા પર ખૂબ વાયરલ થયો હતો. આ વીડિયોએ રણવીર અને તેમના નાના વચ્ચેના પ્રેમાળ સંબંધની ઝલક બતાવી હતી. દિવાળીના ખુશીના માહોલમાં પરિવારના વડીલને ગુમાવવાથી રણવીર સિંહ અને તેમના પરિવાર માટે આ સમય દુઃખદ બની રહ્યો છે.