રણબીર કપૂરને 'બોલિવૂડ' નામ પસંદ નથી, કહ્યું- હોલિવૂડના નામ પરથી ઓળખાવવાના બદલે ભારતીય સિનેમા કહો

અભિનેતા રણબીર કપૂરે હિન્દી સિનેમા અથવા ક્યારેક સમગ્ર ભારતીય ફિલ્મ ઇન્ડસ્ટ્રીને ઓળખાવવા માટે ઉપયોગમાં લેવાતા 'બોલિવૂડ' શબ્દ અંગે પોતાનો અભિપ્રાય સ્પષ્ટ કર્યો છે. એક બ્રિટિશ મીડિયા હાઉસને આપેલા ઇન્ટરવ્યુમાં રણબીરે સ્વીકાર્યું હતું કે તેને 'બોલિવૂડ' શબ્દ ખાસ પસંદ નથી. તે બોલિવૂડ સ્ટારને બદલે ભારતીય અભિનેતા તરીકે ઓળખાવા માંગે છે.

બોલિવૂડ નહીં, ભારતીય સિનેમાના પ્રતિનિધિ તરીકે ઓળખાવા માંગે છે રણબીર

રણબીર કપૂર હાલમાં પોતાની આગામી ફિલ્મ 'રામાયણ' ના પ્રમોશનમાં વ્યસ્ત છે. તાજેતરમાં તે ફિલ્મના અન્ય કલાકારો સાઈ પલ્લવી અને યશ સાથે લંડન ગયો હતો. ત્યાં તેણે ITV સાથે વાતચીત કરી હતી. આ દરમિયાન હોસ્ટે તેને પૂછ્યું હતું કે ભારતીય ફિલ્મો માટે ઉપયોગમાં લેવાતા 'બોલિવૂડ' જેવા વ્યાપક શબ્દથી તેને વાંધો કેમ છે?

આ સવાલના જવાબમાં રણબીરે કહ્યું, "મને લાગે છે કે આ શબ્દ હોલિવૂડ પરથી લેવામાં આવ્યો છે. કારણ કે તે સમયે મુંબઈને બોમ્બે કહેવામાં આવતું હતું, તેથી તે બોલિવૂડ બની ગયું. તે જ રીતે તેલુગુ ફિલ્મ ઇન્ડસ્ટ્રી માટે ટોલીવુડ જેવા શબ્દોનો ઉપયોગ થવા લાગ્યો અને આ રીતે અલગ-અલગ નામો બનાવવામાં આવ્યા."

અભિનેતાએ સ્પષ્ટ કર્યું કે તે ભારતીય સિનેમાના પ્રતિનિધિ તરીકે ઓળખાવા માગે છે. તેણે કહ્યું, "હું ભારતીય સિનેમાના પ્રતિનિધિ તરીકે ઓળખાવા માંગું છું. આપણે એવા દેશમાં રહીએ છીએ, જ્યાં અલગ-અલગ સંસ્કૃતિઓ, ભાષાઓ અને રાજ્યો છે. પરંતુ અંતે આપણે બધા કલા સર્જવાનો પ્રયાસ કરી રહ્યા છીએ. કલા એવી વસ્તુ છે, જે લોકોને એકબીજા સાથે જોડે છે. કલાની કોઈ સીમા હોતી નથી."

રણબીરે વધુમાં કહ્યું, "જ્યારે તમે તમારી સંસ્કૃતિ અને પરંપરામાં ઊંડે સુધી જોડાયેલી કોઈ સારી અને વાસ્તવિક વાર્તા રજૂ કરો છો, ત્યારે તે હંમેશાં દુનિયાના લોકોના દિલ સુધી પહોંચે છે. આપણે 'ક્રાઉચિંગ ટાઇગર, હિડન ડ્રેગન', કોરિયન ફિલ્મો અને 'લાઇફ ઇઝ બ્યુટીફુલ' જેવી ફિલ્મોમાં પણ આવું જોયું છે."

તેણે કહ્યું, "આપણી મહત્વાકાંક્ષા પણ આવી જ હોવી જોઈએ. જોકે, તેનો અર્થ એ નથી કે આપણે આંખ બંધ કરીને માત્ર વૈશ્વિક દર્શકોને ધ્યાનમાં રાખીને ફિલ્મો બનાવીએ. આપણે આપણી વાર્તા અને સંસ્કૃતિને સંપૂર્ણ પ્રમાણિકતા સાથે રજૂ કરવાનો પ્રયાસ કરતા રહેવું જોઈએ."

'રામાયણ' વિશે જાણો

રણબીર કપૂર હાલમાં પોતાની આગામી ફિલ્મ 'રામાયણ' ની રિલીઝની રાહ જોઈ રહ્યો છે. આ અત્યાર સુધીની સૌથી મોંઘી ભારતીય ફિલ્મ હોવાનું કહેવાય છે. નમિત મલ્હોત્રાના પ્રાઇમ ફોકસ સ્ટુડિયો દ્વારા DNEG અને યશની મોન્સ્ટર માઇન્ડ ક્રિએશન્સના સહયોગથી આ ફિલ્મનું નિર્માણ કરવામાં આવી રહ્યું છે.

'રામાયણ' બે ભાગમાં બનાવવામાં આવી રહી છે. ફિલ્મમાં રણબીર કપૂર ભગવાન શ્રીરામની ભૂમિકામાં, સાઈ પલ્લવી માતા સીતાની ભૂમિકામાં, યશ રાવણની ભૂમિકામાં, રવિ દુબે લક્ષ્મણની ભૂમિકામાં અને સની દેઓલ ભગવાન હનુમાનની ભૂમિકામાં જોવા મળશે.

ફિલ્મનો પ્રથમ ભાગ 5 નવેમ્બર, 2026ના રોજ દુનિયાભરના સિનેમાઘરોમાં રિલીઝ થવાનો છે, જ્યારે બીજો ભાગ દિવાળી 2027માં રિલીઝ થશે. આ ફિલ્મ ભારતમાં હિન્દી, તમિલ, તેલુગુ, કન્નડ અને મલયાલમ ભાષાઓમાં રિલીઝ કરવામાં આવશે.

ભારત સિવાયના વિશ્વભરના બજારોમાં ફિલ્મના વિતરણની જવાબદારી સોની પિક્ચર્સ સંભાળશે, જ્યારે હિન્દી ભાષી બજારમાં ધર્મા પ્રોડક્શન્સ ફિલ્મનું વિતરણ કરશે. આ ફિલ્મ વિશ્વભરમાં IMAX ફોર્મેટમાં પણ રિલીઝ કરવાની યોજના છે.