ટાઈગર શ્રોફ નહીં, અન્ય સેલિબ્રિટી હતી અસલી ટાર્ગેટ! ફાયરિંગ કેસમાં ચોંકાવનારો ખુલાસો
ટાઇગર શ્રોફ ફાયરિંગ કેસમાં તપાસ દરમિયાન એક મોટો ખુલાસો થયો છે. આરોપીઓની પ્રાથમિક પૂછપરછમાં સૂત્રો પાસેથી મહત્ત્વની માહિતી સામે આવી છે કે હુમલાખોરોનો પહેલો ટાર્ગેટ ટાઇગર શ્રોફ નહીં પણ અન્ય કોઈ મોટી હસ્તી હતી. આરોપીઓ મુંબઈમાં એક મોટી હસ્તીની હત્યા કરવાના ઇરાદાથી આવ્યા હતા, પરંતુ પહેલાથી નક્કી કરેલા લક્ષ્ય સુધી પહોંચવામાં નિષ્ફળ રહ્યા બાદ આરોપીઓએ ટાઇગર શ્રોફને નિશાન બનાવ્યા.
સોશિયલ મીડિયા રીલ્સ અને ઇન્સ્ટાગ્રામથી કરી રેકી
આરોપીઓને ફેન્સની સોશિયલ મીડિયા રીલ્સ પરથી ટાઇગર શ્રોફની સુરક્ષા વ્યવસ્થા અંગેની માહિતી મળી હતી. ટાઇગર અને તેના ફેન્સના ઇન્સ્ટાગ્રામ એકાઉન્ટ દ્વારા હુમલાખોરોએ પહેલા રેકી કરી અને દરેક પ્રવૃત્તિ પર નજર રાખી. ત્યાર પછી ટાઇગર સાથે પોલીસ સુરક્ષા ન હોવાની માહિતી મળ્યા બાદ હુમલાખોરોએ તેમને નિશાન બનાવ્યા.
બોલિવૂડમાં ભય ફેલાવવાનું ષડયંત્ર
દાવો કરવામાં આવી રહ્યો છે કે બોલિવૂડમાં ડર ઉત્પન્ન કરવા માટે આરોપીઓએ ટાઇગર શ્રોફની હત્યાનું ષડયંત્ર રચ્યું હતું. જોકે હજુ સુધી એ માહિતી સામે નથી આવી કે હુમલાખોરો કઈ બીજી બોલિવૂડ સેલિબ્રિટીને નિશાન બનાવવાની ફિરાકમાં હતા.
ગિલબર્ટ હિલમાં ભાડાના મકાનમાં રહેતા હતા આરોપીઓ
મુંબઈ પોલીસના જણાવ્યા અનુસાર, ટાઇગર પર હુમલાનો આરોપી હૃતિક મુંબઈના ગિલબર્ટ હિલમાં ભાડાના મકાનમાં રહેતો હતો અને તેની સાથે અન્ય બે છોકરાઓ પણ રહેતા હતા, સ્થાનિક લોકોના જણાવ્યા મુજબ, તેઓ પોતાની જાતને ગિગ વર્કર બતાવતા હતા અને રેપિડો માટે કામ કરતા હોવાનું કહેતા હતા.
ટાઇગર શ્રોફની ટીમે ફેક ન્યૂઝ અને AI વીડિયો સામે આપી ચેતવણી
ટાઇગર શ્રોફની ટીમે બનાવટી સમાચાર અને AI વીડિયોને લઈને ચેતવણી આપી છે. ટીમ તરફથી સોશિયલ મીડિયા પર સ્પષ્ટતા કરવામાં આવી છે કે અમે સ્પષ્ટપણે કહેવા માંગીએ છીએ કે ટાઇગર શ્રોફે તાજેતરની ઘટના કે તેની સાથે જોડાયેલા કોઈ પણ ઘટનાક્રમ અંગે ન તો કોઈ નિવેદન આપ્યું છે, ન તો કોઈ વીડિયો જાહેર કર્યો છે અને ન તો કોઈ પ્રકારના સંદેશ કે માહિતીના પ્રસારણની મંજૂરી આપી છે. અમારા ધ્યાનમાં આવ્યું છે કે સોશિયલ મીડિયાના ઘણા પેજ અને ડિજિટલ પ્લેટફોર્મ ટાઇગર શ્રોફના નામે ખોટા સમાચાર, AI દ્વારા બનાવવામાં આવેલા વીડિયો અને મનઘડંત વાર્તાઓ પ્રસારિત કરી રહ્યા છે. આ તમામ દાવાઓ સંપૂર્ણપણે ખોટા અને અનધિકૃત છે, જેનો હેતુ સામાન્ય જનતાને ગેરમાર્ગે દોરવાનો છે.
